- Detalhes
- Escrito por Adelaide da Cunha
- Visualizações: 4434
#TimorLeste #UNTL #CECA #COVID19 #COVID19TL 11 Agostu 2021
Universidade Nacional Timor Lorosa’e (UNTL) nia Diretór Sentru Estudu ba Arte no Kultura (SECA), Profesór Doutór Vicente Paulino, iha Kampus Sentrál UNTL nian, Díli (30/07) hateten, Sentru ne’e nia foku ba pilar haat, (1) peskiza, (2) aprezentasaun semináriu, (3) publikasaun no (4) promove eventu kulturál atu promove kultura iha nível sientífiku ba Timor-Leste.
“Atu promove kultura iha UNTL no ba Timor-Leste, ami garante katak, sei publika obra lubuk ida, tanba agora iha ona prosesu, maibé obra rua sei lansa iha fulan Setembru no iha fulan Outubru no Novembru lansa tan livru rua, relasaun ho komunikasaun tanba ita mós nakloke ba asuntu sira ne’ebé ligadu ho SECA”, hatutan Diretór SECA.
Profesór Vicente mós hatutan, objetivu prinsipál mak atu insentiva profesór sira iha investigasaun ne’ebé asosiadu ba kultura no arte ho enkuadramentu antropolójiku, sosiolójiku no estudu kultura reál sira, liga mós ba aspetu komunikasaun nian no área seluk tan.
“Dadaun SECA halo ona servisu hamutuk ho universidade balun iha rai liur, hodi kontribui ba servisu sentru ne’e nian, nune’e mós nakloke parte hotu ne’ebé hakarak koopera, tanba ne’e ba períodu tinan lima mai garante katak, sei konsentra barak ba peskiza, aprezentasaun sira iha semináriu no publikasaun”, hatutan Diretór SECA.
Sentru ne’e kontinuidade husi sentru anteriór nian ne’ebé ho naran Sentru ba Konservasaun no Dezenvolvimentu Arte no Kultura (SKDAK) atu Konserva no Divulga Kultura tradisionál no seluk tan liuhusi eventu kultural sira, maibé dadaun ne’e transforma ona ba Sentru Estudu ba Kultura no Arte (SECA).
Média UNTL : Leonia de A. da Costa (estajiária)
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 590
#TimorLeste #UNTL #VRAE #UNWomenTL #COVID19 #COVID19TL 09 Agostu 2021
Universidade Nacional Timor Lorosa’e (UNTL), nia Visereitora ba Asuntu Estudantís (VRAE), Profesora Eng. Lígia Tomás Correia, M.Sc, hala’o sorumutu ho Reprezentante UNWOMEN Timor-Leste (UWTL) hodi diskute kona-ba prosesu abertura Programa Kampus Seguru (PKS) iha universidade nasionál.
Relasiona ho eventu refere, Visereitora ba Asuntu Estudantís, iha Sala Vídeo Konferência UNTL nian, Díli (03/08) hateten, parte rua diskuti asuntu tolu, (1) Kompozisaun Grupu Traballu Tékniku, (2) Aprezentasaun Planu Servisu Relasiona ho Kampus Seguru 2021, (3) Data Tentativa ba Serimónia Lansamentu ba Kampus Seguru ne’ebé sei realiza iha loron 27 fulan Agostu tinan ne’e.
“Enkontru ida ohin ami konsege diskute ajenda lubuk ida, maibé asuntu importante liu mak atu abertura ba PKS, no ami konsege sita mós kona-ba depois lansamentu, enkontru dahuluk sei halo aprovasaun ba planu servisu 2021 nian”, tenik Profesora Lígia.
Iha fatin hanesan, analizadora UNWOMEN nian ba Projetu Hamutuk ba Igualdade iha Timor- Leste, Sra. Teresa Verdial, hateten, sorumutu ne’e atu halo revizaun ba termu de referénsia atu fundamenta implementasaun kampus seguru.
“Ohin loron ami mai iha ne’e atu halo revizaun ba termu referensia, inklui deside data tentativa ba lansamentu nian, no diskute mós kona-ba planu sira ne’ebé sei realiza iha futuru, tanba UN mós sei hetan apoiu fundu husi KOIKA, hodi promove PKS ko foku ba asédiu sexual no forma violénsia sira seluk”, dehan Dra Teresa.
UNTL mak reprezenta Ensinu Superiór iha Timor-Leste implementa PKS ba tinan haat hahú husi 2021 too 2024, no prioridade ba kapasitasaun atu hasa’e konsiénsia Sívitas Akadémika universidade, estabelese grupu traballu tékniku, define atividade ne’ebé sensivél jéneru no promove igualidade jéneru.
Média UNTL : Leonia de A. da Costa (estajiária)
Foto : Pio Belo Ximenes
- Detalhes
- Escrito por Adelaide da Cunha
- Visualizações: 880
#TimorLeste #UNTL #FCS #DICS #ADTL #COVID19 #COVID19TL 04 Agostu 2021
Universidade Nacional Timor Lorosa’e (UNTL) nia Dekanu Fakuldade Siénsia Sosiál (FCS), Profesór Camilo Ximenes Almeida, ho Padre Kapelaun UNTL nian, Amu Nívio Lebre Correia, Fdcc, inaugura aula foun ba Departamentu Inkluzaun Komunitária Sosiál (DICS) iha Kampus Kaikoli UNTL nian, Díli (03/08).
Relasiona ho serimónia refere, Diretór DICS nian, Profesór Januário Correia, agradese ba Asosiasaun Defisiente Timor-Leste (ADTL) tanba koopera ona ho universidade nasionál hodi estabelese kursu ne’e iha Ensinu Superiór.
“Ho espasu ne’e, ami agradese ba parte hotu-hotu liuliu ADTL ne’ebé inísiu kooperasaun ho UNTL, hodi fó espasu atu estabelese kursu DICS iha ensinu superiór, fatin ida ne’e sei sai fatin aprendizajen ba timoroan sira ne’ebé ho kondisaun fízika defisiente, hodi hasa’e sira-nia nível koñesimentu ne’ebé bele servi no dezenvolve rai ida ne’e”, esplika Diretór DISK.
Profesór Januário mós hatutan katak, ba futuru sei uza rekursu ne’ebé iha hodi fasilita sira di’ak liután iha prosesu ensinu ne’ebé inkluzivu.
Iha fatin hanesan, atuál estudante DICS nian, Aurelia Correia, ho orgullu tanba universidade fó ona atensaun másimu ba estudante sira ho kondisaun desibilidade.
“Ha’u senti orgullu tebes no kontente, agora ICS sai ona Departamentu atu halibur ita-nia maluk ho defisiénsia hamutuk ho estudante fíziku normal sira hodi aprende hamutuk, no promove mós direitu ema ho defisiensia nian, atu asesu ba Edukasaun Inkluzivu katak inklui ema hotu”, hatutan Aurelia.
Inaugurasaun ne’e partisipa husi, Dekanu FCS Profesór Camilio Ximenes Almeida ho estrutura, Diretór DICS ho estrutura, Amu Kapelaun UNTL Pe. Nívio Lebre Correia, Fdcc, Diretór Ezekutivu ADTL nian, Sr. Cesario da Silva, inklui dosente, estudante no konvidadu sira.
Média UNTL : Altur Ramos (estajiáriu)
Foto : Altur Ramos (estajiáriu), Arkivu DICS
- Detalhes
- Escrito por Adelaide da Cunha
- Visualizações: 3611
#TimorLeste #UNTL #VRAAGK #VAPGP #COVID19 #COVID19TL 04 Agostu 2021
Universidade Nacional Timor Lorosaé (UNTL), liuhusi Visereitoria ba Asuntu Akadémika no Garantia Kualidade (VRAAGK) hamutuk ho Visereitoria ba Asuntu Pós-Graduasaun no Peskiza (VAPGP), realiza Workshop Akadémiku 2021 nian, hodi ko’alia kona-ba kualidade ba Kursu Foun, Revisaun Kurikular no Regulamentu Akadémiku, iha Auditóriu FECT-Hera (04/08).
Magnífiku Reitór, Profesór dr. João Soares Martins, MPH, Ph.D, iha nia abertura hateten, liuhusi eventu refere husu atu partisipante sira bele kontribui hanoin ba mellora kualidade UNTL iha futuru.
“Agradese ba realizasaun eventu ne’e, ne’ebé ko’alia kona-ba kursu foun sira, revisaun kurrikulár, no kualidade akadémika, ne’e misaun Universidade nian, atu bele haree hamutuk parte forte no fraka sira, relasaun ho kualidade kursu ne’ebé eziste ona ita nota liuhusi akreditasaun ho valór hetan C, ne’e ita presiza servisu maka’as liután”, tenik Reitór.
Iha fatin hanesan, Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, hateten, ekipa reitorál foun ne’e haree ba prosedimentu balun ne’ebé presiza hadia.
“Ita haree prosedimentu balun presiza hadia, iha kualidade kursu foun atu haree hamutuk, preparasaun antes estabelese kursu foun ida, revizaun ba kurríkulu tanba kursu barak la’o seidauk halo revizaun, ikus liu mak ita haree ba regulamentu akadémiku, ita foka transferénsia interna no eksterna no seluk tan”, tenik Profesór Samuel.
Workshop Akadémiku 2021 ne’e hala’o durante loron 3 hahú husi 04 to’o 06 agostu 2021, ho sekuénsia sira hanesan, loron dahuluk sei diskuti kona-ba kualidade kursu foun, loron daruak ko’alia kona-ba revizaun kurríkular, no loron ikus diskuti kona-ba regulamentu akadémiku.
Partisipa iha Workshop ne’e Visereitór, Proreitór, Dekanu, Vise-Dekanu, Diretór Nasionál, Diretór Departamentu, Dosente, Estudante no Funsionáriu Administrativu sira.
Média UNTL : Agostinho da Cruz e Silva
Foto : Pio Belo Ximenes
- Detalhes
- Escrito por Adelaide da Cunha
- Visualizações: 3801
#TimorLeste #UNTL #RhodeIslandNationalGuard #COVID19 #COVID19TL 04 Agostu 2021
Universidade Nasional Timor Lorosa’e (UNTL) nia Magnífiku Reitór, Profesór dr. João Soares Martins MP.H Ph.D, hala’o sorumutu ho “Rhode Island National Guard” husi Estadu Unidus Amérika hodi rona sira-nia ideia no esplora kooperasaun ho universidade nasionál iha futuru.
Relasiona ho eventu refere, iha Sala Vídeo Konferênsia UNTL nian, Díli (03/07), Reitór hateten, ekipa Rhode Island National Guard, sira servisu barak teb-tebes kolabora ho F- FDTL iha área defeza no seguransa nian, no sira mós hakarak buka hatene atu kolabora ho UNTL.
“Sira hakarak mai hasoru ita iha UNTL, atu hatene posibilidade bele koopera ho ita liuliu apoiu ba biblioteka no laboratóriu, inklui interkámbiu estudante no dosente sira, maibé sei iha prosesu diskusaun”, tenik Reitór.
Partisipa iha reuniaun ne’e, Proreitora ba Asuntu Kooperasaun nian, Dra. Lídia Gomes, no ekipa Rhode Island National Guard nian.
Média UNTL : Leonia de A. da Costa
Foto : Agostinho da Cruz e Silva