- Detalhes
- Escrito por Adelaide da Cunha
- Visualizações: 1376
#TimorLeste #UNTL #MS #UnicefTimorLeste #SydneyUniversity 28 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, ho nia ekipa peskizadór, aprezenta rezultadu peskiza kona-ba “Saúde inan ho oan no bebé foin moris” iha salaun Hotel Timor-Díli, (28/07).
“Peskiza ne’e hanesan Projetu ida mak manan husi Universidade Sydney, no kolabora ho UNTL, hanesan ita mak halo servisu iha terenu, halo koleksaun dadus komesa iha fevereiru to’o agora, ohin aprezenta rezultadu prelimináriu”, tenik Reitór.
Reitór hatutan, investigasaun ne’ebé hala’o lori benefísiu ba Universidade, tanba promove liután pilár peskiza nian no envolve dosente nomós estudante iha prosesu koleksaun dadus, ho métodu kualitativu no kuantitativu.
Iha fatin hanesan, Diretór Nasional Saúde Família, Sr. Victor Soares hateten, atividade workshop refere atu haree rezultadu prelimináriu peskiza nian.
“Workshop ne’e kona-ba atividade survey ne’ebé implementa liuhusi kolaborasaun entre Universidade Sydney ho UNTL, fundu husi Unicef Timor-Leste, ohin atu haree ba rezultadu peskiza ho nia lema, bareira ba iha komunidade asesu ba fasilidade saúde liga liu bá saúde inan ho oan no bebé foin moris” tenik Sr. Victor.
Sr. Victor mós hatutan, métodu peskiza ne’e mak hanesan halo entrevista ba iha xefi família, nomós halo estudu kazu sira kona-ba asesu komunidade nian liuliu inan ho oan ba iha fasilidade saúde sira, no husi rezultadu peskiza hatudu iha difikuldade oioin atu asesu ba fasilidade Saúde, hanesan estrada ladi’ak no transposte limitadu.
Peskiza refere, ho objetivu atu identifika dezefiu sira ligadu ba inan ho oan iha asesu ba fasilidade saúde sira, uza métodu survei, no lokál tarjetu estudu nian mak munisípiu Díli, Ainaro, Ermera, no Lautem, ho totál uma uma kain hamutuk 267, enkuantu ekipa invesitigadór lidera husi Reitór UNTL nian, ho nia dosente balun, Ministériu Saúde, Institutu Nasional Saúde (INS), inklui estudante sira.
Partisipa iha serimónia ne’e, Diretór-Jeral Diresaun Servisu Apoiu Reitoria, Sr. Jacinto H. S. Belo, Diretora Poliklínika Universitária Doutora Teresa António Madeira Soares, BDS, MPH, Diretór Nasional Saúde Familia Sr. Victor Soares, Reprezentante UNICEF iha Timor-Leste Sr Shyam Sharan Pathak, no enkuantu Doutora Linda no Doutór Nick husi Universidade Sydney partisipa liuhusi via-ZOOM.
Média UNTL : Agostinho da Cruz e Silva
Foto : Agostinho da Cruz e Silva
- Detalhes
- Escrito por Adelaide da Cunha
- Visualizações: 1753
#TimorLeste #UNTL #CFA #COVID19 #COVID19TL 28 JULLU 2021
Universidade Nacional Timor Lorosa’e (UNTL) nia Sentru Formasaun Avansada (SFA) koopera ho Universidade Dhaka, Bangladesh , realiza semináriu loron rua (28-29 Jullu 2021), iha Sala Vídeo Konferénsia UNTL nian, kona-ba projetu Parseiru Global nian ba Edukasaun (PEG-Global Partnership for Education) husi Kanadá.
“UNTL koopera ho Universidade Dhaka husi Bangladesh, iha projetu ne’ebé hala’o iha nasaun lima hanesan Timor-Leste, Nepal , Butan , Bangladesh no Vietnam , halo projetu konjuntu no liuhusi semináriu ne’e ita presiza kria padraun ruma ba medida implementasaun nian tuir padraun parseria nian” tenik Diretór SFA Profesór Apolinário Magno.
Diretór Magno hatutan, Projetu Multianual ne’e ba tinan tolu nian, tanba ne’e UNTL ho Universidade Dhaka mak sei implementa, nune’e liuhusi akordu (MoU) entre instituisaun rua ho mós Ministeriu Edukasaun, Juventude no Desportu.
Profesór Apolinário akresenta liutan, projetu refere foku ba impaktu Pandemia COVID-19 nian ba ema ho defisiénsia no ba sira ne’ebé ladun asesu ba edukasaun no sasukat ho sira-nia partisipasaun no dezempeña iha eskola sira.
Semináriu ne’e hala’o durante loron rua, ba loron dahuluk nian hamutuk dirijente internu UNTL nian no loron tuir mai sei hamutuk ho parseiru sira hanesan, Ministériu Edukasaun, Juventude no Desportu, INFORDEPE, Telkomcel, Ministériu Solidariedade Sosiál no Inkluzaun no influensiadór ba polítika iha edukasaun nian no reprezentante sosiedade sivil sira.
Média UNTL : Leonia de A. da Costa (estajiária)
Foto : Laurindo da Cruz (estajiáriu)
- Detalhes
- Escrito por Adelaide da Cunha
- Visualizações: 3241
#TimorLeste #UNTL #VRAE #USAIDTourismforAll #COVID19 #COVID19TL 27 Jullu 2021
Universidade Nasional Timor Lorosa’e (UNTL) liuhusi nia Gabinete Vise-Reitora ba Asuntu Estudantis (GVRAE), servisu hamutuk ho USAID'S Tourism for All Project LINTL, sei realiza kompetisaun diskursu públiku ho nia tema “Turizmu Sustentavel Liuhosi Kreximentu Inkluzivu iha Ha'u-Nia Timor-Leste 2021-2022”, ho finalidade atu selesiona Embaixadór Foun Turizmu ba iha 2021-2022.
Objetivu (1) Atu hasa'e konsiensia foinsa'e sira kona-ba Politika Nasionál Turizmu Timor-Leste nian, (2) Fornese oportunidade ba foinsa'e sira atu espresa konseitu Turizmu Sutstentavel liuhusi Kresimentu Inklusivu ba publiku, iha ámbitu COVID-19, (3) Dezenvolve foinsa'e sira-nia abilidade iha diskursu públiku, (4) Promove foinsa'e sira hola parte iha USAID's Tourism For All's project-nia atividade sira.
Relasiona ho biban ne’e, GVRAE hakarak informa ba estudante UNTL tomak nian, ne’ebé iha interese hakarak partisipa data hahu rejistu 26-29 fulan Jullu 2021, bele liga ba WhatsApp ho númeru 77860319 ka liuhusi Email: Este endereço de email está protegido contra piratas. Necessita ativar o JavaScript para o visualizar.
Informasaun kompletu bele haree iha dokumentu aneksu.
Média UNTL
- Detalhes
- Escrito por Adelaide da Cunha
- Visualizações: 1725
#TimorLeste #UNTL #DNRU #COVID19 #COVID19TL 28 Jullu 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, rona aprezentasaun kona-ba planu servisu (2022-2026) husi Diretór Diresaun Nasionál Rekursu Umanu (DNRU), Sr. Agustinho Quelo, ho ekipa, iha Sala Vídeo Konferénsia UNTL nian, Díli (27/07).
Objetivu husi sorumutuk ne’e, parte DNRU aprezenta planu ba períodu 2022-2026 ho nia programa prioridade mak hanesan forsa traballu husi Rejime Jerál no Rejime Espesiál, prosesu rekrutamentu ba kargu xefias, nomós aprezenta Perfil DNRU nian.
Reitór agradese no apresia ba servisu Diresaun Nasionál Rekursu Umanu liuliu forsa servisu husi rejime-jerál (funsionáriu) no rejime-espesiál (dosente sira) UNTL nian.
“Ita tenki haree kona-ba forsa servisu husi rejime jerál no regime espesiál tanba ida ne’e importante teb-tebes desde ita tama, ita preokupa tebes, ne’e tenki planeia tuir kultura no natureza universidade nian, hodi bele eleva ensinu, peskiza no servisu komunitáriu sira atu nune’e bele kontribui ba misaun universidade nian”, tenik Reitór.
Reitór mos konvida dosente no funsionáriu sira universidade nian atu hotu-hotu obedese ba natureza akadémiku nian tuir idaidak nia knaar, nune’e universidade bele hatudu nia rezultadu ho kualidade hodi haburas siénsia no kria inovasaun.
Partisipa iha enkontru ne’e Visereitora ba Asuntu Estudantís, Professora Eng.ª Lígia Tomás Correia, M.Sc, Visereitór ba Asuntu Administrasaun Finansa no Administradór Jerál, Profesor Helio A. da Costa Mauquei, Ph.D, no Diretór-Jerál Servisu Apoiu Reitoria Sr. Jacinto H.S. Belo, M.EGA.Egn, no ekipa DNRU.
Média UNTL : Laurindo da Cruz (estajiáriu)
Foto : Laurindo da Cruz (estajiáriu)
- Detalhes
- Escrito por Adelaide da Cunha
- Visualizações: 711
#TimorLeste #UNTL #VRAAGK #FCS #FMCS #FEAH #ANAAA #COVID19 #COVID19TL 26 Jullu 2021
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade, Profesór Doutór Samuel Venâncio de SousaFreitas, iha Kampus Sentrál UNTL nian, Díli (26/07), hateten Departamentu ne’en (6) mak sei hetan avaliasaun husi Ajénsia Nasionál Avaliasaun no Akreditasaun Akadémika (ANAAA) iha tinan 2021 ne’e.
“Ita iha kursu ne’en mak sei hetan avaliasaun husi ANAAA no husi kursu hirak ne’e Departamentu Ensinu Edukasaun Fízika no Desportu mak sei halo reavaliasaun tanba iha tinan hirak liubá sira la akreditadu”, tenik Visereitór.
Visereitór ne’e mós hatutan, Departamentu haat mak submete ona relatóriu ba Universidade no sei falta Departamentu rua mak seidauk submete sira-nia relatóriu.
“Sira-nia relatóriu sexta-feira liubá, mai hatama foin mak Departamentu haat hanesan, Fakuldade Siénsia Sosiál (FCS) no Fakuldade Medisina no Siénsia Saúde (FMCS), sei falta Departamentu rua husi Fakuldade Edukasaun, Arte no Umanidade (FEAH) ita sei fó tempu ituan atu sira hakerek no data termina iha dia 2 fulan agostu 2021” tenik Profesór Samuel.
Bainhira dokumentu hirak ne’e submete ona ba ANAAA, sira halo avaliasaun ba dokumentu (relatóriu) hafoin define kalendáriu halo site visit ba iha terenu hodi haree evidensia hirak ne’ebé mak mensiona iha dokumentu laran.
Departamentu hirak ne’ebé mak atu hetan avaliasaun mak hanesan Departamentu Komunikasaun Sosiál, Departamentu Relasaun Internasionál husi FCS, Departamentu Farmásia, Departamentu Nutrisaun no Dietétika husi FMCS, Departamentu Ensinu Edukasaun Fízika no Desportu, Departamentu Ensinu Dalen Tetun husi FEAH.
Média UNTL : Agostinho da Cruz e Silva
Foto : Pio Belo Ximenes