Mapa do Site        TL |  PT |  ENG 
Notícias  (+)
Kampus Sentral - UNTL, 7 Junho 2016
CC-Universidade Nasionál Timor Lorosa’e (UNTL), inagura fatin instalasaun foun ba reitór, ne’ebé prezide missa husi amu Ângelo Salsinha no Asina mós nota entendimentu ida ho Escola Portuguesa de Díli, hodi kria kooperasaun ba área formasaun. Reitór UNTL niam, Profesór Doutór Francisco Miguel Martins, hateten katak serimónia ne’e atu asina protokolu ho Escola Portuguesa de Díli no inagura mós fatin foun reitór nian ne’ebé foin reabilita hodi servisu ho fiar, responsabilidade tan fatin ne’e importante atu hasai desizaun ba dezenvolvimentu Institusionál UNTL nian. “Ita sei simu Universidade sira hamutuk kuaze 150 husi nasaun CPLP nian ne’ebé hanaran AULP (Associação das Universidades de Língua Portuguesa - AULP) inklui Macau, ne’ebé realiza kada tinan maibé konferénsia internasionál tinan ne’e UNTL mak sai uma nain”, Reitór afirma. Relasiona ho asina protokolu ne’e, Retór hateten UNTL asina ona memorandum ho nasaun oioin no instituisaun lokál, nasionál sira atus ida hitunulu atu kria kooperasaun bilaterál, trilaterál, multilaterál iha aspetu dezenvolvimentu rekursu umanu ne’ebé importante ba futuru nomós sei asina tan iha konferénsia AULP ne’e. Entretantu Diretór Aprovizionamentu, José Carlos Amaral de Araújo, informa katak reabilitasaun ne’e ho montante orsamentu $ 14.412.30 ho mobiliario inklui meza, kadeira, sofa no seluk tan ho inisiativa husi Reitór atu halo atividade AULP nian. Konferénsia AULP sei akontese iha loron 29 Juñu to’o loron 1 Jullu 2016, ne’ebé sei iha asembleia jerál, palestra iha plenária, ho area temátika espesífika, aprezentasaun husi peskizadór sira-nian, lansamentu livru no fó prémiu ba manán nain ba hakerek livru. UNTL hola parte ba AULP iha tinan 2003, ne’ebé partesipa ona iha konferénsia sira AULP nian. Preparasaun ba konferénsia ne’e kompostu husi komisaun internasionál ne’ebé sedeada iha Lisboa, no UNTL hanesan komisaun lokál tanba únika sai uma nain hodi realiza eventu ne’e.
Kampus Sentral UNTL, Dili, 1 Junho 2016
Prezidenti Asosiasaun Estudante Fakuldade sira, Konvoka primeira reuniaun hodi eleje sira nia reprezentante ba órgaun superiór UNTL nian Ohin, loron Kuarta-feira, data 01 Juñu 2016, iha Kampus Sentrál UNTL, konvoka reuniaun dahuluk entre prezidente eleitu sira husi órgaun Asosiasaun Akadémika Estudante nian ho objetivu hodi eleje reprezentante estudante nain 3 ba túr iha órgaun superiór UNTL nia sira ho Mandatu tinan 2. Reuniaun dahuluk ne’e partisipa husi prezidente eleitu sira husi órgaun Asosiasaun Akadémika Estudante nian husi Fakuldade 8 iha UNTL, hamutuk ema nain 24, Feto 3 Mane, 21, ne’ebé akompaña husi Lideransa UNTL no Tekniku Administrativu sira husi Gabinete Pro-Reitór Assuntu Estudante. Rezultadu husi reuniaun dahuluk ne’e, hili reprezentante estudante nain tolu ho sistema votasaun lista nakloke, finalmente Kandidatu nain 8 ne’ebé konkore ba vaga ka postu refere, sira nain 3 mak konsege eleitu ba pozisaun sira hanesan tuir mai ne’e: 1. Lizerio Dias, estudante husi Fakuldade Ciência Sociais, Departementu Relasaun Internasionál, eleitu ba membru Konsellu Jeráll UNTL, 2. Januário F. Pinto, estudante husi Fakuldade Filosofia, Departementu Filosofia Jeral, eleitu ba membru Konsellu Dixiplinár UNTL, no 3. Emelita do Rosario, estudante husi Fakuldade Medicina e Ciência Saúde, Departementu Parteira, eleita ba membru Senadu Akadémika UNTL,
Centro Convenções De Dili , 27 Maio 2016
Reitór UNTL, Francisco Miguel Martins, iha nia diskursu, agradese ba inan-aman sira ne’ebé fó konfiansa ba UNTL hodi haruka oan sira mai estuda iha instituisaun ida ne’e, hamutuk ho entidade tomak, inan-aman parente, viziñu, nomós Estadu, Governu, Parlamentu Nasionál, autoridade sivil no militár. “Ba Graduandu sira, imi konsege ultrapasa tiha obstáklu, susar oioin, osan, hahan, hela fatin laiha, hodi hela ho família hodi estuda, ikus mai ho esforsu tomak konsege susesu, dalaruma ema dehan “A luta continua a vitória sempre, ohin imi-nia loron vitória no loron ikus iha UNTL”, hateten Reitór. Fonte ne’e dezeja no hato’o parabens ba graduadu sira maibé dezafiu foun sei barak liután no simples liu maka la hetan servisu, buka husi fatin ida ba fatin seluk ema taka odamatan, lalika dezanimadu, tanba ne’e luta nafatin basa UNTL fó de’it maka kail, la’ós ikan maibé kail ne’ebé sai bukae ida oinsá buka ikan barak liután. Ministru Koordenadór Asuntu Sosiál no Ministru Edukasaun António da Conceição, iha nia diskursu hateten sistema edukasaun no ensinu tenke forma rekursu umanu ho kualifikadu ne’ebé Timor-Leste presiza hodi kontinua konstroe nasaun ida ne’e, no agradese ba korpu-dimplomátiku sira ne’ebé apoiu ona UNTL liuhusi projetu kooperasaun oioin. “UNTL tenke sai modelu referénsia ba instituisaun seluk, iha kulidade ensinu ministradu ho kualidade jestaun no organizasaun institusionál. Liuhusi traballu ekipa, bazeia ba prinsípiu profisionalizmu, disiplina, rigór maka bele alkansa no konsolida UNTL sai “Sentru Exelénsia ba Ensinu Superiór iha Timor-Leste” rekomenda Ministru Edukasaun. Ministru ne’e, felisita ho momentu ida ne’e, lori naran Ministériu Edukasaun nian kongratula ba graduandu sira tanba bele konklui sira-nia kursu superiór, liuhusi dedikasaun no esforsu, loron ne’e rekoñesida hodi hahú ho etapa foun ida iha ne’ebé konvidadu hodi partesipa iha dezenvolvimentu Nasionál. Liuhuai Oratio Sapientia, Eis-reitór UNTL, Aurélio Guterres, katak bainhira laiha siénsia no teknolojia mundu ne’e sai oinsa loos tanba ne’e, interese hodi kompriende mundu ne’e, ho nia fenomena naturál sira, hahú husi pre-istória hodi buka alkansa koñesimentu ho kbiit fó sentidu ba moris hodi prezerva moris. Juventina Correia Ximenes, graduada Cum laude, ne’ebé reprezenta graduadu sira hateten haree ba roda dezenvolvimentu ho nia progresu, sira sente nakboluk partisipa iha prosesu ida ne’e, liuhusi estuda makaas, buka matenek, no koko buka hatene segredu Sapientia ET Veritas, espíritu atu serbí. “Kada prosesu iha nia rekejitu, ami balun halo inam-aman ba maluk sira seluk tiu, avó sai enkarregadu edukasaun no balun auto-sustentavel. Ho situasaun reál ne’ebé ami enfrenta maibé buat lubuk maka universidade iha hodi lori ona ami to’o rohan ba síklu ida ne’e”, Juventina hato’o. Antes fila ba hamutuk ho komunidade, graduada ne’e, husu ba UNTL ho Governu atu hamoris hikas programa Pós-graduasaun, Mestradu no Doutoramentu atu halo poupansa ba fundu mina-rai, aranja materiál barak liután bodik ba nesesidade ensinu-aprendizajen, hamoris asosiasaun alumni UNTL nian no dignifika fundadór mahuluk sira-nian tanba ho sira maka ita bele. UNTL harii iha loron 17 fulan novembru 2000, ho nia vizaun “Sentru Exelénsia ba ensinu superiór iha Timor-Leste” hodi gradua ona ba dalasanuluk resin lima hahú tinan 2003, ho graduadu ne’ebé sai fini ba futuru hamutuk rihun sanulu resin.
Kampus Fakuldade Ekonomia No Jestaun - UNTL, 18 Maio 2016
Universitáriu sira ne’ebé hamahan-an iha ESHANA (Estudante Hadomi Natureza), realiza seremónia Isar Bandeira iha foho lulik matebian nian tutun hodi presta omenajen no valoriza eroi sira-nia luta, iha aldeia Wai-buro, Suku Hai koni, Postu Administrativu Baguia Munisípiu Baucau. Relasiona ho atividade viajen ne’e, Prezidente Komisaun Organizadór João Hornai, iha nia entrevista hateten iha programa ne’e konvida universitáriu sira hotu iha UNTL hodi selebra hamutuk loron boot hotu hanesan 20 Maiu, 28 Novembru no 20 Agostu atu fó hanoin ba partesipante sira hodi fó valór ba loron istóriku sira. “Ami (Grupu ESHANA) hili Foho Matebian ba tinan ida ne’e tanba nu’udar fatin istóriku ne’ebé uluk sai fatin abrigu ba luta nain sira, nomós maluk sivíl sira subar fatin hodi hatene loloos fatin istóriku ne’e oinsá maka ita-nia luta nain sira hili fatin refere”, afirma Atuál Estudante Fakuldade Ekonomia no Jestaun ne’e. Iha fatin hanesan, Evalina do Rosário Mendonça, membru ESHANA, sente orgullu tanba bele selebra loron espesiál ne’e iha Foho Matebian ho partesipante barak, katak loron istóriku ne’e labele komemora de’it iha sidade. “Programa ne’ebé ami sei hala’o maka sei dada bandeira iha foho mateian nia tutun no ami iha divizaun oioin hanesan divizaun ambientál sei fó formasaun ba estudante no komunidade sira atu hatene oinsá hadomi natureza, no divizaun sosiu-ekonómiku kulturál atu husu potensiál saida de’it maka iha”, hatutan Evalina. Vise-dekanu Asuntu Estudantíl, FEG, Longuinhos dos Santos, atividade ne’e estudante sira realiza hodi komemora loron 20 maiu no halo mapeamentu ba fatin istóriku Foho Matebian nian no tau mós emblajen ruma atu iha oportunidade ba governante sira, atu ita hanoin hikas no sai mós fatin potensiál turístika. Grupu Estudante Hadomi Natureza ka Eshana, eziste iha Fakuldade Ekonomia no Jestaun ne’ebé envolve estudante hodi hadomi Natureza liuhusi programa oioin hodi fó atensaun ba komunidade no publiku katak natureza ne’e presiza konserva tanba kontribiu ba luta timoroan sira nian durante rezisténsia.
LICEU, Dili, Timor-Leste, 17 Maio 2016
Fakuldade Edukasaun Arte no Umanidade, realiza judisium iha Líceu sesta-feira (17-5) ne’e hodi despede ho finalista sira hamutuk nain 146 ho tema “Memoria mak Dalan no Roman Ba Dezenvolvimentu Nasionál”. Iha diskursu, Dekanu Fakuldade Edukasaun Arte no umanidade, Pedro Soares, hateten judisium ne’e seremónia ida ne’ebé ho karakterístika akadémiku hodi halo atribuisaun títulu akadémiku ba estudante unuversitáriu sira ne’ebé maka hala’o nia estudu iha universidade (UNTL) maibé la’ós fasil tanba liuhusi esforsu ho estuda, no terus oioin. “Sai husi fatin ida ne’e, ita-boot sira-nia knar boot liután tanba ne’e dedika an bainhira servisu iha fatin ruma liuliu nu’udar edukadór. Ohin loron Ministériu Edukasaun iha nia planu hodi reforma profesór sira, entaun Graduadu sira mak iha papel importante hodi troka” Eis-vise dekanu Asuntu akadémiku FEAH ne’e mós afirma katak. Fonte ne’e agradese ba entidade tomak tantu inan-aman, funsionáriu, dosente sira ne’ebé fó apoiu ba prosesu tomak graduadu hirak ne’e to’o finaliza estudu iha universidade ne’e. Iha periodu dahuluk tinan letivu 2016 ne’e, UNTL sei fó graduasaun ba finalista hamutuk nain 331 ne’ebé sei hetan títulu nu’udar baixarelatu no lisensiadu iha área estudu oinoin husi Universidade Nasionál Timor Lorosa’e (UNTL). Tuir kalendáriu Akadémiku graduasaun ba periodu ne’e sei hahú iha loron 25 fulan Maiu, loron 25 gladi iha Sentru Konvensaun Dili, no graduasaun sei hahú iha loron 27.
Sala Auditorio LICEU, Dili, Timor-Leste, 16 Maio 2016
Universidade Udayana koopera ho UNTL realiza semináriu no kapasita estudante sira ne’ebé mak hakarak kontinua estudu iha Universidade Udayana no deskute mós konaba oinsa haluan Departamentu Saúde Animál ba Fakuldade Saúde Veterinária. Dekanu Fakuldade Agrikultura Acasio Cardoso Amaral, iha nia entrevista ba jornalista UNTL, segunda-feira (16-5), hateten katak ekipa husi Universidade Udayana mai fó seminariu kona-ba Bio-gás no kria diskusaun detallu kona-ba kooperasaun entre Universidade Udayana no UNTL hodi upgrade Diploma Saúde Animál ba Fakuldade Veterinária Medisina iha UNTL. Iha fatin hanesan, Prezidente Organizasaun Antigu Estudante husi Universidade Udayana Enga. Brigida Antónia Correia katak kooperasaun entre universidade rua ne’e atu kapasita estudante ne’ebé hakarak kontinua estudu iha Universidade Udayana. “Ami alumni ne’ebé hela iha estranjeiru (Timor-Leste) harí ami-nia organizasaun ida ne’e atu servisu hamutuk ho universidade Udayana liuliu iha área rekursu umanu, dahuluk fasilita Timoroan sira mak hakarak ba eskola iha Udayana, daruak kria mós relasaun ho ministériu kompetente no UNTL, oinsá Universidade Udayana bele iha ligasaun di’ak liuhusi kria atividade peskiza”, Alumni ne’e afirma. Organizasaun ne’e harii iha tinan rihun rua sanulu resin haat (2014) no oras ne’e dadaun sira fó ona ezame ba estudante ne’ebé mak remata husi ensinu sekundáriu. Iha tinan ida ne’e estudante hamutuk hát-nulu-resin lima ne’ebé prepara ona atu ba estuda iha Universidade Udayana Indonézia no iha posibilidade ba nivel lisensiatura, mestradu.
Faculdades
Agricultura
Ciências Exatas
Ciências Sociais
Direito
Economia e Gestão
Educação, Artes e Humanidades
Engenharia, Ciência e Tecnologia
Filosofia
Medicina e Ciências da Saúde
Investigação
Centro de Estudos de Género
Centro de Formação Avançada para o Ensino e Aprendizagem
Centro de Língua Inglesa
Centro Nacional de Investigação Científica
Centro para a Mudança Climática e Biodiversidade
Instituto da Língua Portuguesa
Instituto de Estudos de Paz, Conflito e Social
Instituto Nacional de Linguística
Estudos Pós-Graduados
Pós-GraduaçõesMestrados
Cooperação Nacional e Internacional
Cooperação Nacional e Internacional
© 2016 UNTL - Universidade Nacional Timor Lorosa'e Última Atualização: 2016-06-24
DNIT - Direção Nacional de IT webmaster@untl.edu.tl