Universidade Nacional Timor Lorosa'e (UNTL), Faculdade de Agricultura (FAGRI) nia Visedekanu ba Asuntu Akadémiku, Profesór Marçal Gusmão nu'udar mós dosente hatete, aula ba estudante semestre par tinan 2023 nian seidauk termina agora no sei iha faze ezame finál.
"Aula semetre pár 2023 nian ba estudante sira seidauk termina, agora sei iha faze ezame finál nian, maioria aula iha hela prosesu ezame finál nian, inklui mós ha'u-nia materia ida seidauk fó ezame, no materia balu ne’ebé ezame ona mós ha'u halo koresaun seidauk hotu", dehan Visedekanu iha knaar fatin, Kampus Sentral UNTL, Díli (22/01).
Profesór ne'e esplika, aula ne'e konsidera tarde tanba, hahú simu estudante foun presiza prosesu, rejistrasaun, priense fixa planifikasaun no foin hahú aula, maibé sira esforsu hodi termina aula, maské tarde uitoan no ne'e ladun iha implikasaun boot liu ba estudante sira.
Iha sorin seluk, tuir estudante Fakuldade Edukasaun Arte no Umanidade, Departamentu Fízika, Isabel Pereira hatete, materia semestre par nian seidauk remata tanba materia rua hanesan, Kuríkulu ho Fizika aplikada (1) seidauk iha ezame finál.
"Ami-nia materia ba semestre par nian, seidauk remata, hela materia Kurríkulu no materia Fízika Aplikada (1) mak seidauk ezame, tanba profesór sira sei ba vizita estudante estajiáriu sira ne'ebé estájiu iha Munisípiu, no ami nafatin hein informasaun husi profesór hodi ezame" dehan Isabel iha resintu kampus FEAH, Liceu.
Dekanu Faculdade de Filosofia e Ciência Humana (FFCH), Profesór Martinho Borromeu hatete, aula iha fakuldade nian termina duni iha fulan Dezembru, inklui valór sira iha hotu ona, tanba dosente esforsu hodi termina iha dezembru liubá.
"Ami Filosofia aula ba semestre tuan 2023 termina ona la tarde, normalmente aula kada tinan ba semestre rua, semestre dahuluk hahú husi Marsu-Juñu no semestre daruak nian Agostu-Dezembru no ami termina duni aula iha fulan Dezembru, ami nia oráriu ba aula tinan 2024 nian sei hahú 15 Fevereiru, oráriu sai ona, ami hein ba aula de'it ona", dehan Dekanu.
#TimorLeste #UNTL #FAGRI #FFCH 1 Fevereiru 2024
Média UNTL 📝: Leonia de A. da Costa
Foto 📷: Domingos Amaral