Universidade Nacional Timor Lorosa’e (UNTL) nia Magnífiku Reitór Profesór dr. João Soares Martins, MPH. Ph.D, konvida sivitas akadémika universidade nian atu partisipa iha Isar-Bandeira ne’ebé hala’o iha inísiu kada fulan, tanba atividade ne’e hanesan dever ida.
“Serimónia Isar-Bandeira ne’e ita hala’o atu sivitas akadémika tomak bele partisipa, tanba nu’udar sidadaun iha dever no responsabilidade.
Ita sei halo rotasaun ba kada Fakuldade sira, tanba ne’e husu ba Fakuldade sira atu halo preparasaun. Nune’e, Isar Bandeira bele halo mós iha kampus seluk, labele iha sentrál de’it”, dehan Reitór liuhusi diskursu, iha Kampus Sentrál UNTL nian, Díli (05/02).
Reitór mós husu estrutura no funsionáriu hotu nia prontidaun no responsabildade, atu partisipa másimu iha Isar-Bandeira atu bele fó omenajen ba ita nia eroi sira.
“Isar-Bandeira ne’e, husu ita atu hato’o omenajen ba ita-nia eroi sira. Tanba ne’e, agradese mós ba responsável ekipa Reitória nian ne’ebé uza mós vestuáriu tais. Ba oin ita idaidak mai uza ho selenda ida”, dehan Reitór.
Isar-Bandeira fulan Fevereiru nian responsavel husi Ekipa Gabinete Reitoria no partisipa husi Visereitór, Proreitór, Diretór Jerál, Dekanu, Diretór Nasionál, Xefe Departamentu, Dosente no funsionáriu sira.
#TimorLeste #UNTL 05 Fevereiru 2024
Média UNTL 📝: Domingos Amaral
Foto 📷: Domingos Amaral & Agostinho da Cruz