#TimorLeste #UNTL #VRAE # USAIDTimorLeste #COVID19 #COVID19TL 31 Jullu 2021
Universidade Nacional Timor Lorosa’e (UNTL) liuhusi Gabinete Visereitora ba Asuntu Estudantis (VRAE) nian, servisu hamutuk ho US Agency for International Devolpment (USAID) , fahe informasaun ba estudante sira ne’ebé atu tuir kompetisaun diskursu públiku ho tema “Turismu Sustentável liuhusi Kresimentu Inkluzivu Iha Ha’u-Nia Timor-Leste”.
Relasiona ho eventu refere, VRAE nia Xefe Departamentu ba Atividade Estrakurikulár, Sr. José de Jesus dos Santos, iha Auditóriu Liceu (30/07) hateten, atividade ne'ebé hala'o atu fahe informasaun ba estudante sira ne'ebé iha talentu atu tuir kompetisaun diskursu públiku.
“Atividade ohin ne’e ita servisu hamutuk ho USAID iha Timor-Leste, fahe informasaun ba estudante sira ne’ebé iha talentu no iha interese atu partisipa iha kompetisaun diskursu públiku ba área turizmu nian, no parte ida hodi kapasita estudante sira iha nível Ensinu Superiór”, tenik Sr. José.
Sr. José mós hatutan, kompetisaun diskursu nian la limita ba sé de’it mak hakarak partisipa iha atividade no informasaun sira ne’e espalla hotu ba iha fakuldade sia (9) iha UNTL.
Iha fatin hanesan, Koordenadór Nasionál USAID, Sr. Fonseca Miranda, dezeja katak, ho diseminasaun ne'e, partisipante sira bele hatene ona prosesu no kretéria sira atu konkore ba kompetisaun.
“Kompetisaun ba tinan ida ne’e foku liubá área turizmu mundial ne’ebé bolu “tourism cloud” bazeia ba kontekstu Timor-Leste nian mak ho tema “Turismu Sustentável liu husi kresimentu inkluzivu iha hau-nia Timor-Leste”, dehan Fonseca.
Liuhusi programa ne’e, hakarak fó oportunidade ba joven sira hodi desenvolve sira nia abilidade kona-ba diskursu públiku no atu introdús (Program Tourism For All Project) ba ema hotu no rezultadu husi kompetisaun ida ne’e mak sei hili feto ida no mane ida atu sai embaixadór ba tinan 2021-2022.
Média UNTL : Laurindo da Cruz (estajiáriu)
Foto : Pio Belo Ximenes (voluntáriu)