- Detalhes
- Visualizações: 324
#TimorLeste #UNTL #VPMPO #CPI #COVID19 #COVID19TL 5 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, agradese ba Vise-Primeiru no Ministru ba Planu no Ordenamentu (VPMPO), S.E. José Maria dos Reis, ne’ebé fó biban ba akadémiku hotu, liuliu universidade nasionál atu partisipa iha prosesu ba Reajustamentu Planu Estratéjiku Dezenvolvimentu 2011-2030 nian, iha Auditóriu FECT-Hera UNTL nian (04/02). 
“Agradese ba Governu liuhusi VPMPO, S.E. José Maria dos Reis, ne’ebé envolve akadémiku sira iha reajustamentu Estratéjiku 2011-2030 nian, ne’e hatudu katak timoroan mós bele no hatene liu situasaun nasaun nian, hodi fó ideia ne’ebé realístiku”, tenik Reitór.
Iha fatin hanesan, Vise-Primeiru-Ministru ba Planu no Ordenamentu, S.E. José Maria dos Reis, informa, Reajustamentu Planu Estratéjiku ho hanoin katak, presiza haree uluk lai instrumentu planeamentu nian hodi orienta planu estratéjiku refere nia implementasaun ba oin.
“Difikuldade sira hanesan, laiha prioridade programa, laiha orsamentu mós atu bele aloka tuir prioridade sira ne’e, planu ne’e implementa ona tinan sanulu, kurtu prazu nian, 2011-2015 kompleta ona, médiu-prazu 2015-2020 mós kompleta ona, maibé haree fali ba longu prazu 2020-2030 nian, tanba ne’e espera hamutuk ho akadémiku sira bele kontribui liután ba implementasaun tuir mai", dehan Vise PM.
Iha reuniaun konsultasaun ba reajustamentu Planu Estratéjiku Dezenvolvimentu (PED 2011-2030) ne’e, partisipa husi Magnífiku Reitór sira hotu iha Timor-Leste, Visereitór sira, Dekanu, Dosente no Estudante, no konvidadu sira.
Média UNTL 📝 : Leonia de A. da Costa
Foto 📷 : Avelino da Costa Bobo, Laurindo da C. Gomes
- Detalhes
- Visualizações: 372
#TimorLeste #UNTL #ConselhoGeralUNTL 5 Fevereiru 2022
Universidade Nacional Timor Lorosa'e (UNTL), nia Magnífiku Reitór, Profesór dr.João Soares Martins MPH, Ph.D. ho Konsellu Jerál nian deskuti vaga ba estudante foun nian ne'ebé atu asesu iha tinan akadémiku 2022, iha sala Video Konferénsia UNTL nian, Díli (04/02). 
Objetivu husi sorumutu ne'e, atu haree kona-ba númeru estudante no universidade nasionál nia kapasidade relasiona ho rekursu umanu, infraestrutura, no fasilidade sira.
Partisipa iha sorumutu ne'e, Diretora-Jerál Ensinu Superiór, Dra. Maria Filomena Lay Guterres, Prezidente Konsellu Jerál UNTL nian, dr. Aniceto Cardoso Barreto, ho nia membru sira.
Média UNTL 📝 : Denilson Amandio Barros
Foto 📷 : Altur Ramos
- Detalhes
- Visualizações: 402
#TimorLeste #UNTL #FEG #MESSK 3 Fevereiru 2022
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH Ph.D, hamutuk ho Ministru Ensinu Superior, Siénsia no Kultura (MESSK), S.E. Longuinhos dos Santos, inaugura edifísiu foun ba Fakuldade Ekonomia no Jestaun (FEG), iha resintu FEG-UNTL nian, Díli (03/02).
Magnífiku Reitór UNTL iha nia diskursu agradese ba VIII Governu Konstitusionál tanba bele disponibiliza ona orsamentu ba konstrusaun edifísiu hodi hadia fasilidade ba ensinu nian.
“Agradese tebes ba VIII Governu liuhusi MESSK, ne’ebé disponibiliza ona orsamentu mai UNTL ba konstrusaun ida ne’e, nune’e bele responde ba preokupasaun Fakuldade nian liga ba saladeaula”, tenik Reitór.
Magnífiku Reitór hatutan ho edifísiu foun ida ne’e bele responde ba nesesidade akadémika nian ho efisisiénsia no efikásia ba estudante, no dosente hotu.
Iha sorin seluk, Ministru Ensinu Superior, Siénsia no Kultura nian hateten, polítika VIII Governu Konstitusionál tau prioridade ba área infrastrutura atu bele hadia kondisaun ensinu aprendisajen iha universidade.
“VIII Governu Konstitusionál tau prioridade ba área infraestrutura atu hadia kondisaun ba ensinu aprendisajen ida ne’ebé ho kualidade, importante tebes ba dosente no estudante sira atu iha aula ne’ebé adekuadu ho nia fasilidade di’ak atu bele ativu liutan iha prosesu aprendisajen”, tenik Dr. Longuinhos.
Ministru mós hatutan, inagurasaun ne’ebé hala’o iha nia signifikadu bo’ot tanba bainhira UNTL iha nia kondisaun ne’ebé diak mak reprezenta ona oportunidade atu bele hadia di’ak liután kualidade rekursu umanu ba Timor-Leste.
Edifísiu refere hahú konstrusaun iha tinan 2019, no konstrui husi Kompañia Aitula Unipessoa Lda. 
Partisipa iha inagurasaun ne'e, S.E Vise-Ministru Komérsiu no Indústria, Sr. Domingos Lopes Antunes, Prezidente Funsaun Públika, Dr. Faustino Cardoso Gomes, Diretór Ezekutivu ANAAA, Dr. Edmundo Viegas, Eis Reitór UNTL, Profesór Dr. Francisco Miguel Martins, Visereitór, Proreitór, Diretór-Jerál, Diretór Nasionál sira, Diretór Kompañia Aitula ho nia traballadór sira, inklui reprezentante husi instituisaun sira seluk.
Média UNTL 📝 : Agostinho da Cruz e Silva
Foto 📷 : Denilson A. Barros
- Detalhes
- Visualizações: 317
#TimorLeste #UNTL #MinistériodaSaúde #WHOTimorLeste #UNICEFTimorLeste #COVID19 #COVID19TL 4 Fevereiru 2022
Universidade Nacional Timor Lorosa'e (UNTL) nia Magnífiku Reitór, Profesór dr. João Soares Martins, MPH Ph.D, partisipa iha enkontru ba Avaliasaun Nasionál Programa Liga Inan no Saúde Materna Infantíl, organiza husi Ministériu Saúde, iha Salão São José Katedrál nian, Dili (04/02).
Objetivu husi atividade refere atu avalia servisu ne'ebé durante ne'e pesoál saúde sira halo iha kada munisípiu inklui Rejiaun Administrativa Espesiál Oecusse Ambeno (RAEOA). 
Iha okaziaun hanesan ne'e lansa mós ba livru haat (4) ne’ebé sai matadalan ba servisu saúde nian.
Partisipa husi S.E. Ministra Saúde, dra. Odete Maria Freitas Belo, reprezentante UNICEF nian, Dr. Denis Muhoza, Reprezentante Organizasaun Saúde Mundiál (WHO), Dr. Arvind Mathur, Diretór-Jerál sira, Diretór Sentru Saúde sira, Xefe Departamentu no Pesoál Saúde Munísipiu sira, inklui konvidadu sira. 
Média UNTL 📝 : Laurindo da Cruz Gomes
Foto 📷 : Laurindo da Cruz Gomes
- Detalhes
- Visualizações: 309
#TimorLeste #UNTL #VRAAGQ 02 Fevereiru 2022
Universidade Nacional Timor Lorosa’e (UNTL) nia Visereitór ba Asuntu Akadémiku no Garantia Kualidade, Profesór Doutór Samuel Venâncio de Sousa Freitas, iha Kampus Sentrál UNTL nian, Díli (25/01) hateten, rezultadu husi kursu ne’en ne’ebé hetan avaliasaun husi Ajénsia Nasionál Avaliasaun no Akreditasaun Akadémika (ANAAA), Departamentu lima mak akreditadu ho valór C, no Departamentu ida akreditadu ho valór B. 
“Ita hetan ona rezultadu husi ANAAA kona-ba Departamentu neen ne’ebé avalia ona iha 2021 liubá, no rezultadu fahe ona ba Fakuldade sira, hanesan kursu lima akreditadu ho C no departamentu ida mak akreditadu ho B”, tenik Visereitór.
Visereitór hatutan, bazeia ba padraun sanulu husi Ajénsia Nasionál ba Avaliasaun no Akreditasaun Akadémika (ANAAA) nian, avaliasaun hodi eleva kualidade akadémiku, no idaidak hetan rekomendasaun ba futuru bele hadia kurikulum, infraestrutura, rekursu umanu, fasilidade no seluk tan.
Departamentu hirak ne’ebé mak hetan avaliasaun husi Fakuldade Medisina no Siénsia Saúde: Departamentu Farmásia (C), Departamentu Nutrisaun i Dietétika (C); Fakuldade Edukasaun, Arte no Umanidade: Departamentu Ensinu Dalen Tetum (C), Departamentu Ensinu Edukasaun Físika no Desportu (C), enkuantu Fakuldade Siénsia Sosiál: Departamentu Komunikasaun Sosiál (B), Departamentu Relasaun Internasionál (C).
Média UNTL 📝 : Denilson Amandio Barros
Foto 📷 : AMoises do Rego