- Detalhes
- Visualizações: 390
#TimorLeste #UNTL #VRAE #FEG #SECOOP #COVID19 #COVID19TL 14 Fevereiru 2022
Universidade Nacional Timor Lorosa'e (UNTL) nia Visereitoria ba Asuntu Estudantís koopera ho Sekretaria Estadu Kooperativa (SEKOOP) fasilita formasaun durante loron haat (8-11 fevereiru) ba estudante no alumni, na’in tolu nulu resin lima (35) kona-ba olprosesu harii kooperativa, iha kampus Fakuldade Ekonomia no Jestaun FEG-UNTL nian, Díli (11/02).
Visereitora ba Asuntu Estudantís (VRAE), Profesora Eng.ª Lígia Tomás Correia, M.Sc agradese ba SEKOOP ne'ebé ho vontade hodi fahe matenek ba alumni no estudante universidade nian, atu prepara sira harii kooperativa iha futuru.
"Agradese ba formasaun ne'ebé hala'o durante loron haat (4) liuliu ba formador sira ne'ebé ho vontade hodi oferese formasaun ba mai nia alumni no estudante sira, no rezultadu husi atividade ne’e bele kontribui ba sira idaidak nia futuru", tenik Visereitora.
Iha fatin hanesan, Diretór-Jerál SEKOOP nian, Sr. Francisco Xavier, husu ba alumni no estudante sira ne’ebé partisipa ona iha formasaun atu tau matenek no koñesimentu ne'ebé di'ak hodi aplika ba prátika.
"Agradese ba formandu sira liuliu Profesora Lígia Tomas Correia no Profesora Brígida Correia liuhusi inisiativa bele hamosu formasaun oinsa bele iha koñesimentu kona-ba kooperativa hodi fasilita estudante no alumni sira iha universidade", tenik Diretór-Jerál.
Iha fatin hanesan, formandu João Francisco Ruas Hornai hateten, durante loron haat sira aprende kona-ba kooperativa, prosesu harii no jere kooperativa ho diak, kontabilidade jestaun no finanseiru kooperativa nian.
"Ami senti kontente tanba simu matéria hirak ne'e sai hanesan bukae ba ami no komprende tipu kooperativa sira oinsá mak akadémiku bele harii kooperativa iha universidade", dehan. 
Média UNTL 📝 : Denilson Amandio Barros
Foto 📷 : Denilson Amandio Barros
- Detalhes
- Visualizações: 444
#TimorLeste #UNTL #PA-RAEOA #COVID19 #COVID19TL 12 Fevereiru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, ho ekipa hasoru komunidade Suku Lifau, Postu Administrativu Pante Makasar, Rejiaun Administrativa Oe-Cusse Ambeno (RAEOA), atu dada-lia kona-ba prosesu atu entrega rai ba UNTL, iha Suku Lifau (08/02).
Magnífiku Reitór UNTL agradese ba komunidade husi uma-lisan (Sarentomov, Campu, Portu no Oebeno) ne’ebé ho vontade rasik oferese rai ba UNTL.
“Agradese tebes ba Komunidade Lifau oan sira ne’ebé ho vontade tomak hakarak oferese rai ba UNTL, bainhira rai ne’e faz parte ona ba UNTL, fasilita ona Universidade atu iha futuru bele hari’i nia ramu ida iha ne’e”, tenik Reitór.
Iha fatin hanesan, Rai na’in Sr. João da Costa hateten rai refere nu’udar eransa Uma-Lisan haat nian no hakarak entrega ba universidade nasionál hodi bele fasilita rekursu iha Oe-Cussi Ambeno.
“Rai ne’e, eransa Uma-Lisan (Uma Lulik) haat nian, husi ami-nia avó sira to’o ohin loron hanesa rai komun, hakarak atu entrega ba universidade atu bele hari’i eskola, tanba durante ne’e lifau-oan difikuldade tebes atu asesu ba edukasaun superiór, liuliu UNTL” tenik Sr. João. 
Diretor Terras Propriedade-REAOA, Sr. Celestino Casenube, hateten, dadaun ne’e esforsu hela atu haree prosedimentu legál kona-ba privadu komunitáriu atu bele utiliza ba importánsia públiku.
“Ami dadaun ne’e halo hela esforsu atu haree ba prosedimentu balun antes entrega rai ne’e, karik rai ne’e privadu komunitáriu entaun nia prosedimentu legál, liga ho lei ne’ebé estabelese iha ita-nia rai atu utiliza ba impártansia públika”, tenik Sr. Celestino.
Sr. António hatutan, bainhira parte administrasaun nian remata ona mak sei konvidada hikas universidade atu bele entrega rai ne’e ba UNTL.
Vizita refere akompaña husi Diretór-Jerál Servisu Apoiu Reitoria, Sr. Jacinto H. S. Belo, ho Diretór Nasionál sira, Dekanu FMCS, Profesór José Dionisio Ximenes, ho nia Vise-Dekanu sira, Sekretáriu Rejionál Edukasaun no Soliedariedade Sosial RAEOA, Sra. Abelina da Costa, funsionáriu Gabinete PA-RAEOA nian, Autoridade Lokal Suku Lifau no komunidade.
Média UNTL 📝 : Agostinho da Cruz e Silva
Foto 📷 : Agostinho da Cruz e Silva
- Detalhes
- Visualizações: 323
#TimorLeste #UNTL #FMCS #RAEOA #COVID19 #COVID19TL 11 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D ho nia ekipa ofisialmente entrega lista estajiáriu na’in tolunulu (30) husi Fakuldade Medisina Siénsia Saúde (FMCS) nia Departamentu Medisina Jerál ba Administradór Hospital Regional Oe-Cusse Dr. Manuel da Cunha, iha Hospital Regional Oe-Cusse, (08/02).
Magnífiku Reitór agradese ba Autoridade Rejiaun Administrativu Espesial Oe-cusse Ambenu (RAEOA) liuliu responsável Hospital nian, ba kooperasaun hodi fasilita estájiu ba estudante sira FMCS nian, hodi hala’o estájiu klínika.
“Agradese tebes ba kooperasaun ida ne’e, ne’ebé kontinua simu universidade nasionál nia estudante sira husi Fakuldade Medisina nian ne’ebé mak hala’o pratika iha ne’e”, tenik Reitór.
Iha fatin hanesan, Dekanu FMCS nian, Profesór José Dionísio Ximenes, iha entrevista hateten, estudante sira hahú estájiu iha 27 Janeiru liubá, bainhira to’o iha lokál estudante balun pozitivu COVID-19.
“Estajiáriu hamutuk na’in 30 sira ne’e, mai iha 27 janeiru liubá bainhira sira to’o iha ne’e, halo teste swab na’in 10 mak pozitivu, entaun tenki tama izolamentu no estudante seluk auto karantina iha uma, tanba ne’e mak ohin sira la marka prezensa, ita halo akta entrega”, dehan Dekanu FMCS.
Iha fatin hanesan, Adminitradór Hospital Regional Oe-Cusse, dr. Manuel da Cunha hateten, estudante sira to’o iha Oe-Cusse balun hatudu sintomas, nune’e, médiku sira halo teste balun hetan pozitivu COVID-19.
“Bainhira estudante sira ne’e to’o iha ne’e, balun hatudu sintomas COVID-19, tanba ne’e, teste swab rezultadu iha na’in sanulu mak pozitivu, nune’e mak sira hela iha fatin izolamentu, sira seluk autokarantina iha uma, agora balun rekupera ona,”, tenik Administradór.
Iha atividade refere, akompaña husi Diretór-Jerál Servisu Apoiu Reitoria, Sr. Jacinto Belo, ho Diretór Nasionál sira, Dekanu FMCS ho nia Vise-Dekanu sira, Sekretáriu Rejionál Edukasaun no Soliedariedade Sosial RAEOA, Sra. Abelina da Costa, no Funsionáriu RAEOA nian. 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva
- Detalhes
- Visualizações: 412
#Timorleste #UNTL #CCI-TL #COVID19 #COVID19TL 11 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares, MPH, Ph.D enkontru ho Prezidente Câmara Comércio Indústria-Timor-Leste (CCI-TL), Sr. Oscar Lima, hodi diskute kooperasaun entre instituisaun rua, iha Edifísiu CCI-TL, Acait Dili (11/02).
Magnífiku Reitór hateten, enkontru ida ohin importante no nesesáriu tebes atu estabelese relasaun formál entre UNTL ho CCI-TL.
“Dejezu tebes karik permite asina MoU ida entre CCI-TL ho UNTL, parte seluk ami-nia estudante sira husi UNTL mós bele mai hala’o estájiu iha ne’e, liuliu ba Fakuldade Ekonomia, Agrikultura no Enjeñaria, atu nune’e bele servisu hamutuk iha área relevante sira ho CCI-TL”, tenik Magnífiku Reitór.
Reitór UNTL salienta liután katak, talvez sei servisu hamutuk para haree iha área peskiza no emprendedorizmu nian iha futuru.
“Karik iha ona MoU, ita bele halo ona programa konjuntu, atu fahe esperiénsia importante tebes, ami bele konvida emprezáriu sira ba halo semináriu atu sira bele fahe andamentu sira kona-ba emprezáriu nian”, tenik.
Iha fatin hanesan, Prezidente CCI-TL nian. Sr. Oscar Lima hatete, previléjiu bo’ot ida ohin hasoru malu ho Magnífiku Reitór UNTL diskute no hametin di’ak liután koperasaun ba oin. 
“CCI-TL hetan fiar husi Governu ne’ebé fó ba ami hodi reprezenta setór ekonómiku iha Timor-Leste, apezar ita-nia ekonomia no setór privadu sei fraku, maibé ami-nia kontribuisaun ne’ebé ami halo sei kontinua nafatin, hodi kontribui ba dezenvolvimentu”, hatutan Lima.
Partisipa husi, Visereitora ba Assuntu Estudantís, Profesora Eng.ª Lígia Tomás Correia, M.Sc, Diretór-Jerál Servisu Apoiu Reitoria, Sr. Jacinto H. S. Belo. M.EGA. Egn, Vise Prezidente no Diretór sira husi CCI-TL.
Média UNTL 📝 : Altur Ramos
Foto 📷 : Agostinho da Cruz e Silva
- Detalhes
- Visualizações: 384
#TimorLeste #UNTL #PA-RAEOA #COVID19 #COVID19TL 9 Fevereiru 2022
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins MPH, Ph.D, enkontru ho Prezidente Autoridade Rejiaun Administrativa Espesiál Oe-Cusse Ambeno (PA-RAEOA), Exelénsia Arsénio Paixão Bano, iha edífisiu RAEOA, (08/02), hodi fó koñesimentu Estajiáriu Fakuldade Medisina no Siénsia Saúde (FMCS), Departamentu Medisina Jerál no aprezenta planu UNTL ba RAEOA iha futuru.
Hafoin enkontru Magnífiku Reitór iha entrevista hateten, iha vizita ne’ebé hala’o atu fó koñesimentu ba Prezidente Autoridade, no iha momentu hanesan aprezenta mós planu UNTL ba RAEOA iha futuru.
“Ohin ita hala’o enkontru ho Prezidente RAEOA nian hanesan parte hodi fó koñesimentu kona-ba estajiáriu FMCS nian, momentu hanesan ita mós hato’o UNTL nian ba futuru atu loke nia ramu ida iha RAEOA”, tenik Reitór.
Magnífiku Reitór mós hatutan rezultadu enkontru Prezidente Autoridade RAEOA mós apoiu maka’as planu hirak ne’e atu bele loke UNTL nia ramu ida atu fó biban ba Oe-Cusse oan sira asesu ba universidade nasionál.
Vizita refere akompaña husi Diretór-Jerál Servisu Apoiu Reitoria, Sr. Jacinto H. S. Belo, ho Diretór Nasionál sira, Dekanu FMCS, Profesór José Dionisio Ximenes, ho nia Vise-Dekanu sira, Sekretáriu Rejionál Edukasaun no Soliedariedade Sosial RAEOA, Sra. Abelina da Costa, no funsionáriu Gabinete PA-RAEOA nian. 
Média UNTL 📝 : Agostinho da Cruz e Silva
Foto 📷 : Agostinho da Cruz e Silva