- Detalhes
- Escrito por Mateus Goncalves
- Visualizações: 385
Universidade Nacional Timor Lorosa’e (UNTL), nia Diresaun Nasionál Atendimentu Estudante (DNAE), halo ona readmisaun ba estudante hamutuk atus tolu neen nulu (360), husi totál 25.021 ne’ebé tama ona iha lista preskrisaun (Drop-Out), falta 24.661.
“Tuir estudante ne’ebé la mai readmisaun hamutuk 25.021 bazeia ba dadus ne’ebé ami rejista no rekolla komesa husi tinan 2000 to’o mai 2022, maibé iha fulan Agostu tinan 2022 liuba, hafoin Magnífiku Reitór ho estrutura realiza konferénsia imprensa kona-ba rejime preskrisaun.
Rejime preskrisaun ne’e hodi husu ba estudante sira ne’ebé la ativu atu mai halo readmisaun ba sira-nia estudu bazeia ba data ne’ebé fo sai no ami konsege simu estudante sira ne’ebé mai halo readmisaun na’in 360 no sei falta na’in 24.661 mak seidauk mai halo rejistrasaun”, tenik Diretór DNAE, Sr. Rui Loco Pires.
Liuhusi entrevista iha Kampus Sentral (12/10), Visereitór ba Asuntu Akadémiku no Garantia Kualidade, Profesór Samuel Venâncio de Sousa Freitas, hatete dadaun ne’e sei iha prosesu regularizasaun matrikula ba estudante la ativu sira, to’o semestre Impar 2024.
“Iha Press Conference ne’ebé halo iha Agostu 2022 liuba, ita fó tempu fulan 18 sei to’o iha fevereiru 2024. Agora iha faze regularizasaun, estudante barak mak mai halo readmisaun, balun hein de’it ezame monografia, balun iha prosesu hakerek, maibé maioria seidauk mai. Tanba ne’e ita sei haree dadus estudante la ativu no halo rejistrasaun depois fulan fevereiru sei halo desizaun ba sira”, hateten.
Profesór Samuel hatutan Drop-Out hatur ona iha regulamentu akadémiku tinan kotuk (2022), maibé sei fó tempu ba estudante sira bele halo readmisaun to’o iha fulan fevereiru 2024. Universidade kontinua husu nafatin ba estudante sira atu hakbesik mai hodi reativa fali sira-nia estudu.
#TimorLeste #UNTL #VRAAGQ #DNAE 17 Outubru 2023
Média UNTL 📝: Eugenia de Jesus & Agostinho da Cruz
Foto 📷: Agostinho da Cruz
- Detalhes
- Escrito por Mateus Goncalves
- Visualizações: 337
Universidade Nacional Timor Lorosa’e (UNTL) nia Faculdade de Ciências Sociais liuhusi Departamento de Relações Internacionais servisu hamutuk ho Centro Nacional Invesitgação Científica (CNIC) realiza konferénsia ho tema “O Desafio da Diplomacia do Estado de Timor-Leste para o Futuro", iha Salaun Quartel Jeral F-FDTL, Fatuhada, Díli (16/10).
Magnífiku Reitór UNTL Profesór dr. João Soares Martins MPH, Ph.D, iha nia diskursu agradese ba panelista sira ne’ebé fahe ona sira-nia esperiénsia ba estudante sira, relasiona ho tema ne’ebé define.
“Ohin sesaun ida furak tebes, ita iha panelista sira husi Eis Embaxadór, Akadémista sira no Eis Ministru sira, espera katak alin sira bele aproveita másimu buat balun hodi prepara-an ba futuru bele sai diplomata hodi luta ba Timor-Leste nia interese” hateten Reitór.
Iha fatin hanesan Diretór Departamento de Relasaun Internasionál-FCS Profesór Bernardo Idalina Leto,M.Si, hateten konferénsia realiza tanba servisu hamutuk entre fakuldade ho CNIC, atu partilla informasaun ne’ebé iha relasaun ho diplomasia nian ba estudante sira.
“Konferénsia ohin ne’e organiza husi FCS nia Departamento de Relações Internacionais, servisu hamutuk ho CNIC, ne’ebé mak tenta halo atividade ne’e kada fulan, hanesan liga ba asuntu diplomasia nian mak ita konvida eis embaxadór no sira seluk atu partilla informasaun relasiona ho tema ne’ebé define”, hateten Profesór Leto.
Partisipa iha Konferenisa ne’e Proreitora ba Asuntu Provedoria no Akonsellamentu (PRAPA) Profesora Teresa de Jesus Vaz Cabral, Dekana Fakuldade Turismo Arte Industriais Criativas Culturais Profesora Glenda M. S. de Carvalho, estudante sira husi, UNTL, UNDIL, UNPAZ, UCT no UNITAL.
#TimorLeste #UNTL #FCS #CNIC 16 Outubru 2023
Média UNTL 📝: Agostinho da Cruz e Silva
Foto 📷: Pio Belo Ximenes
- Detalhes
- Escrito por Mateus Goncalves
- Visualizações: 340
Universidade Nacional Timor Lorosa’e (UNTL) nia Centro de Estudo Cultura e Arte (CECA) realiza atividade kompetisaun Kultura no Artes ho tema ‘’Promover A Nossa Cultura’’ ho modalidade : UNTL STAR, Corro, Dansa Cultura no Drum Band.
Iha Kampus Sentral UNTL nian, Díli (13/10), Xefe Departamento Arte e Contemporanea (DAC) Emeliana da C. Borromeu Andrade hatete, atividade ne’e realiza hahú iha fulan Agostu, agora to’o iha faze Semi Final ba estudante sira na’in 20 no sira ne’ebé pasa ba faze final hamutuk 11 no sira sei kompete fali iha 23-25 Outubru ne’e.
‘’Ami-nia objetivu husi atividade ne’e atu bele promove no bele kapasita liután estudante sira-nia talentu iha arte no kultura nian. Atividade ida ne’e tinan-tinan ami hala’o ba estudante sira no tinan ida ne’e modalidade UNTL Golden Memory mak ami la konsegue hala’o maibé sei iha fali iha tinan oin’’, dehan.
Atividade ne’e partisipa husi juri sira, konkorente sira, no tuir planu modalidade Drum Band ne’e sei loke ba Ensinu Sekundáriu sira hanesan : Canossa, Cristal, São Pedro, São João Paulo II no Annur.
#TimorLeste #UNTL #CECA 16 Outubru 2023
Média UNTL 📝: Laurindo da Cruz Gomes
Foto 📷: Leonia da Costa de Araujo
- Detalhes
- Escrito por Mateus Goncalves
- Visualizações: 258
Universidade Nacional Timor Lorosa’e (UNTL), liuhusi Diresaun Nasionál Aprovisionamentu hakarak fo sai ba públiku kona-ba rezultadu konkursu Públiku ba manan nain sira, ba Construsaun Cantina iha Campus Sentral no Moderniza sala Auditoriu Faculdade Siénsia Sosiais Caicoli.
Mak ne’e de’it ba informasaun lahaluhan hato’o obrigadu wa’in.
- Detalhes
- Escrito por Mateus Goncalves
- Visualizações: 368
Universidade Nacional Timor Lorosa’e (UNTL) nia Faculdade de Ciências Sociais (FCS) desloka ona estudante finalista na’in 280 ba hala’o Estájiu Servisu Sosiál (ESS) iha munisípiu Aileu, Ainaro no Manatuto, hodi serbí no moris hamutuk ho komunidade durante fulan rua (Outobru-Dezembru) 2023.
Relasiona ho asuntu ne’e, Reprezentante Dekanu FCS nian, no atuál Diretór Departamento de Relações Internacionais, Mestre Bernardo Leto, hatete, atividade Estágiu Servisu Sosial, estudante sira tun iha terenu durante fulan rua, asaun sira kombina entre teoria ho prátika iha terenu hamutuk ho komunidade.
"Ami husi FCS iha Departamentu hitu (7) estájiu ne’e departamentu haat, ida agora dadaun koloka iha Munisípiu Aileu ho total estudante na’in 140 ne’ebé distribui ba suku hitu (7). Kada lokal koloka estudante na’in 20. Nune’e, liuhusi ESS ne’e estudante sira tun iha terenu durante fulan rua, asaun sira kombina entre teoria ho prátika iha terenu hamutuk ho komunidade”, hatutan Profesór Leto, iha Salaun Munisipál, (11/10).
Sekretária Administrasaun Munisípiu Aileu Feliz Maria de Oliviera hato'o bemvindu ba UNTL liuliu FCS, tanba desloka ona estudante sira ba Aileu, ba fatin estájiu nian, iha Postu-Administrativu Aileu Villa nia Suku hitu (7).
"Agradese ba universidade tanba hili ona Aileu ba estájiu ne’e. Ami prontu koopera, garante ita-nia alin sira-ne’e bele asegura sira-nia estájiu durante fulan rua (2). Husu alin estajiáriu sira, atu hamutuk ho xefe suku sira hodi dezevolve programa ruma di’ak ba komunidade, liuliu loron komemorativa sira hanesan 12 novembru, 28 novembru sira mós bele prezensa bele ajuda mós loron boot”, hatutan.
FCS nia estudante sira ba ESS 2023 ne’e hamutuk na’in 280, distribui ba munisípiu Aileu 140, Munisípiu Ainaro 59 no Munisípiu Manatuto 81.
#TimorLeste #UNTL #FCS #PAM-Aileu 13 Outobru 2023
Média UNTL 📝: Miguel Gonçalves & Aniceto Afonso dos Santos (estajiáriu)
Foto 📷: Aniceto Afonso dos Santos (estajiáriu)