Universidade Nacional Timor Lorosa’e (UNTL), Fakuldade Siénsias Sosiais (FCS), liuhusi Departamentu Relasaun Internasionál (DRI) nia ekipa futsál feto mak sai vensedór dahuluk iha kompetisaun desportu ho modalidade Futsál FCS CUP 2020, no futsál mane vensedór husi Departamentu Komunikasaun Sosiál (DKS).
Jogu refere realiza iha kampu futsál suku Vila-Verde, ho objektivu atu desenvolve talentu desportivu estudante sira, no hanesan mós meiu ba ekipa feto no mane hodi hametin lasu amizade entre estudante husi departamentu neen (6) mak eziste iha fakuldade.
Relasiona ho jogu FCS-Cup 2020, Prezidente Komisaun, Candido Araujo da Silva, iha kampu futsál Vila Verde, Díli hateten katak jogu refere nu’udar meiu ida hodi hametin lasu amizade entre estudante sira FCS nian.
“Jogu FCS Cup ne’e realiza iha fulan marsu 2020 liubá, maibé tanba ho prezensa COVID-19 iha Timor-Leste entaun estende tiha, durante Estadu Emerjénsia, no reinisia fali iha 06 jullu no final iha loron 12 agostu. Jogo ne’e realiza hodi hametin lasu amizade entre estudante sira ne’ebé hamahan an iha fakuldade ne’e”, tenik Prezidente Komisaun.
Iha fatin hanesan, jogadór Silvestre Castro sente kontente no agradese tebes ba Fakuldade nia ekipa organizadora sira, tanba iha inisiativa hodi promove estudante sira nian talentu iha área desportu.
“Ami sente kontente tebes tanba Fakuldade liuhusi nia Asosiasaun Akadémika Estudantil (AAE) iha inisiativa bele loke kompetisaun ida ne’e tanba bele promove talentu iha área desportu nian, maské okupa iha II lugar maibé demonstra duni ami nia relasaun amizade”, tenik Silvestre estudante husi Departamentu Komunikasaun Sosiál.
Iha fatin hanesan, reprezentante autoridade lokál Suku Vila-Verde nian, Sr. Joanico Albano Ximenes, ho kontente tebes, apresia FCS-UNTL ne’ebé realiza kompetisaun hodi anima mós komunidade sira.
“Ami konsellu suku mós fo apoiu tomak no prepara fatin ba sira, ami observa durante jogu hahú to’o agora la’o ho diak no anima tebes komunidade”, dehan Joanico.
Manan na’in ba kompetisaun refere mak hanesan, futsál-feto, dahuluk husi Departamentu Relasaun Internasionál, daruak husi Departamentu Administrasaun Públika no datoluk husi Departamentu Siénsia Politika. Embora manan na’in ba futsál-mane, ba dahuluk husi Departamentu Komunikasaun Sosial semestre 7, daruak husi Departamentu Komunikasaun Sosial semestre 3 no datoluk mak Politika Públika semestre 5.
Média UNTL 
: Francisco Colo (estajiáriu)
: Francisco Colo (estajiáriu)Foto 
: Francisco Colo (estajiáriu)
: Francisco Colo (estajiáriu)