UNTL-FEJ ESHANA SEI KOMEMORA ANIVERSÁRIU FALINTIL DA-45 IHA MINDELU

#TimorLeste #UNTL #FEJ 19 Agostu 2020WhatsApp Image 2020 08 18 at 16.01.59

Universidade Nacional Timor Lorosa’e (UNTL), nia Fakuldade Ekonomia no Jestaun (FEJ), liuhusi Estudante Hadomi Natureza (ESHANA), sei komemora aniversáriu loron FALINTIL ba da-45 iha Mindelu, abrigu saudozu Nicolau Lobato nia mate fatin, Posto Administrativu Turiskai, Munísipiu Manufahi.

Koordenadór ESHANA nian, Cesaltino da Silva Belo, iha Kampus FEJ nian, antes aranka ba Mindelu hateten katak, komemorasaun ba tinan ida ne’e sei selebra hamutuk ho komunidade sira iha Suku Mindelu Turiskai, lokál ne’ebé sai abrigu ba Saudozu Nicolau Lobato ho nia membru sira-nia mate fatin iha 31 dezembru 1978.

“Relasiona ho loron FALINTIL ba da-45 ne’e, ami grupu ESHANA hili suku Mindelu Turiskai hodi komemora loron importante ne’e hamutuk ho komunidade sira, tanba fatin ne’e abrigu ba saudozu Nicolau Lobato no nia fatin mate,” tenik koordenadór.

Estudante FEJ ne’e mós hatutan katak, atividade ne’ebé sei hala’o iha Suku Mindelu mak selebrasaun ba tinan 45 FALINTIL nian, halo peskiza ba istória saudozu Nicolau Lobato nian, ligadu ho aspetu sosiál, kultura no ekonómika, sei loke mós filmajen istóriku nomós sei sosializa informasaun konaba meiu-ambiente nian ba komunidade.

Estudante ne’e akresenta liután, atividade sira ne’e ho objetivu lori eventu nasionál sira atu hakbesik ba komunidade iha área rurál.

Média UNTL 📝 : Agostinho da Cruz e Silva
Foto 📷 : Arkivu ESHANA