Sosiedade Azia Pasífiku (Pacifik Asia Society-PAS) husi Korea Sul no Universidade Nacional Timor Lorosa’e (UNTL) liuhusi mobilidade akadémika promove asaun karitativa tulun orfanatu sira iha Uma Orfanatu Madre Dominicana do Rosario Bidau-Dili Sábadu (12-01).
Relasiona ho asaun ne’e, Magnífiku Reitór UNTL Profesór Francisco Miguel Martins louva ho inisiativa ne’e tanba estudante sira iha ona intensaun sensitive ba moris sosiál.
“Ita eduka sira la’ós atu hanoin de’it sira-nia aan maibé hanorin sira hatene hanoin sosiedade, realidade moris sosiál nian. Tanba ne’e ita louva karitativa ne’e ba ita-nia maluk seluk hodi fó liman, neon atu alin sira bele krese hanesan ho ita”.
Profesór ne’e deskreva katak asaun karitativa ne’e estudante sira fó liuhusi diskusaun grupu nian ho sasan sira. Hahan balun, ropa, no material sira eskola nian livru, lapezeira, sapatu ho livru tuir nivel estudante nian.
“Lia-menon ba alin no oan sira iha Orfanatu Dominicana do Rosario ne’e atu utiliza didi’ak tempu ne’ebé Madre sira fó domin hodi prepara imi ho di’ak husi atividade sosiál, eskola, moral I espirituál nian”.
Iha fatin hanesan Supervizora PAS-Korea nian Ju Se Jing agradese ba Madre sira ne’ebé simu asaun kartitativa ne’e.
“Ami sei esforsu atu tinan sira tuir atividade ne’e sei la’o nafatin. Tanba ami-nia objetivu atu tulun nasaun sira ne’ebé funu no ki’ak barak liuliu hadi’ak sira-nia saúde atu sai ema ne’ebé di’ak ba futuru”.
Ju Se Jing hateten Tulun sira hanesan ne’e maské lato’o maibé ho oituan tau hamutuk bele tulun sira husi kiik to’o asesu ba universidade ne’e dalan ida di’ak tebes.
“Liuhusi programa PAS nian Ami husi Korea sei reza ba Imi iha Timor-Leste no husu mós imi atu reza ba Ami atu ita-nia relasaun ne’e ba oin bele metin liután“.
Relasiona ho asaun karitativa ne’e Superiora Orfanatu Dominicana do Rosario Bidau, Madre Maria de Fátima Pui agradese ba tulun ne’e liuhusi vizita no haree situasaun labarik sira oan ki’ak inan-aman laiha.
“Alin sira nain 45, durante ne’e ami fó formasaun ba sira maské sira eskola iha liur maibé depoizde sai eskola sira aprende suku, aprende komputadór, Inglés, Portugés, matemátika ho múzika”.
Misionária Dominikana do Rosario ne’e haktuir oan ki’ak sira mai husi família ne’ebé karakter lahanesan.
“Ita-nia Madre sira koko fó formasaun ida integrál liuliu dezenvolvimentu pesoál katak la’ós matenek de’it maibé emosionál, espirituál, no fíziku tanba sira presiza isin saudável ho estuda ho di’ak”.
Atividade ne’e hola parte ba pilár universidade nian “estensaun i dedisaun ba komunidade”. Ne’ebé implementa liuhusi interkámbiu entre PAS-Korea ho UNTL ne’ebé kobre ho atividade oioin maka halo ona abertura iha 7 janeiru no sei enserra iha 20 janeiru 2019. *Edisaun Média UNTL*