UNTL-FEG REALIZA KONGRESU KJAS BA DALA II

Universidade Nacional Timor Lorosa’e (UNTL) liuhusi Faculdade de Economia e Gestão (FEG) nia Komunidade Joven ba Asaun Solidariedade (KJAS) realiza Kongresu daruak ho tema “Renovasaun Estatutu no Rejimentu Internu, no Eleisaun ba Estrutura Períodu 2024-2026, iha Auditóriu Faculdade de Engenharia Ciência e Tecnologia nian Hera, Díli (23/02).

Reprezentante Visereitora ba Asuntu Estudantís no atuál Xefe Departamentu Alumni Empregabilidade Sr. Elvino Alves hatete, kongresu ida-ne’e sei preside husi presidente meza hodi haree kona-ba estatutu no rejimentu ba organizasaun nian no sei apresia husi kongresista sira.

“Ha’u rona katak total membru sira hamutuk 500, ha’u fiar katak organizasaun ida ne’e sei prepara Timoroan sira ba solidariedade ba maluk sira seluk. Universidade liuhusi Gabinete Estudantíl sei apoiu nafatin ba atividade estudante nian iha organizasaun KJAS ne’e. Ha’u espera katak liuhusi atividade sira bele tulun di'ak liu iha sosiadade’’, dehan Sr. Elvino.

Vise-Dekanu Asuntu Estudantil FEG Profesór Aleixo Ximenes hatete, kongresu daruak ne’e atu hadia administrasaun no renova estatutu, regulamentu, rejimentu ba organizasaun nian hodi hala’o atividade sira no atividade sira ne’ebé la’o iha hotu senadu nia mahon.

‘’Ha’u mós iha obrigasaun atu kria estatuta para regula organizasaun ne’e liuhusi senadu no atu hahú ita sei troka estrutura foun atu servisu iha organizasaun KJAS hodi fortaleza ajuda liuhusi dadus hodi fó benefísiu ba komunidade no ba UNTL”, dehan Profesór Aleixo.

Tuir Prezidente Ezekutivu KJAS Carlos Filipe Fernandes Lopes Tilman Belo hatete, atividade kongresu ne’e kontinuasaun husi atividade ne’ebé hala’o ona hodi halo aprovasaun ba estatutu no rejimentu internu no estabele estrutura foun ba KJAS ba períodu 2024-2026 nian.

‘’KJAS apresia tebes ba parseria sira mak durante servisu hamutuk hodi hala’o atividade sira tuir kondisaun no kbiit organizasaun nian. Atu garante existensia ne’e mak ita tenki kria kondisaun mak halo kongresu hodi bele kria regulamentu no rejimentu internu hodi regula atividade tuir ambiente fakuldade no universiade, atividade hotu ne’ebé hala’o iha komunidade reprezenta universidade no fakuldade nian’’, dehan Carlos.