Universidade Nacional Timor Lorosa'e (UNTL) liuhusi Proreitoria ba Asuntu Dezenvolvimentu Instituisionál (PRADI) nia Jestór Projetu Sr. Fernão Soares Reis, M.Eng, iha Kampus Sentrál, Díli (23/02) informa katak, edifísiu foun Faculdade de Agricultura (FAGRI) nian iha Hera, parte PRADI halo ona levantamentu iha terenu no koordena ona ho kompañia konstrutór hodi hadia.
Tuir esplikasaun Jestor Projetu ne’e, PRADI halo ona levantamentu iha terenu no identifika katak, fondasi no sinta la rahun, iha ne’ebá akontese maka plester ba iha sinta parte kantilever maka la metin, no sei la fó impaktu direta ba estrutura edifísiu ne’e rasik.
“Ha'u agradese ba kolega ida ne'ebé espalla informasaun iha Media Sosial kona-ba Edifísiu Fagri ne'e. Ami PRADI koordena ona kompañia konstrutór no kompaña rasik hadia ona. Aleinde ne’e atu justfika mós katak rai ne’ebé kle’an ka monu ne’e, kauza husi udan been tun bebeik hodi hamout raihenek ne'ebé ita ateru iha parte sinta kantilever nia okos, ne’e la’ós iha fondasi uma nian. Ne’e duni, sei la fó impaktu direta ba fondasi”, dehan Sr. Fernão.
Sr. Fernão mós konfirma katak, validade ba kontrusaun (tempo retensaun) ne'e to'o tinan ida, karik iha tinan ida nia laran mak edifísiu ne'e iha problema ruma, kompañia bele hadia fila fali bazeia ba akordu.
Progressu durante konstrusaun bele hare iha link tuir mai: https://web.facebook.com/untl.edu.tl/posts/4835539316467415
Média UNTL : Leonia de A. da Costa
Foto : Leonia de A. da Costa