Universidade Nacional Timor Lorosa’e (UNTL) nia Magnífiku Reitór Prof. dr. João Soares Martins MPH. Ph.D ho Vise-Ministru ba Operasionalizasaun Hospitais S.E. Flavio B. Mendes de Araujo halo inaugurasaun ba Poliklínika Universitáriu, iha Kampus sentral UNTL nian Dili (21/12).
Iha diskursu Magnífiku Reitór hatete, ho grasa Maromak nian bele halibur hamutuk hodi halo inaugurasaun ba Políklinika UNTL nian, tanba prepara ona iha tinan tolu kotuk ba nia prosesu hetan ona lisensa.
“Naran Poliklínika la’ós atu fó atendementu de’it ba Sivitas Akadémika UNTL (Estudante, Dosente no Funsionariu) sira, maibé bele serve mós ba estudante sira FMCS hodi hala’o estájiu no prátika”, dehan Reitór.
Iha fatin hanesan Vise-Ministru ba Operasionalizasaun Hospitais S.E. Flávio B. Mendes de Araujo hatete, prezensa Poliklínika ne’e kuandu hetan ona konfiansa husi Sivitas Akadémika ne’e di’ak, tanba hamenus ona pasiente husi universidade ne’e ba ospitál.
“Prezensa Poliklínika tuir Ministériu Saúde nia haree bele prepara mós formasaun ne’ebé iha no bele ajuda mós Governu iha nia servisu sira. Ha’u mós fiar katak fatin ida-ne’e bele sai fatin akonsella di’ak no fatin ne’ebé bele haree ba aspetu saúde mentál hodi bele hasa’e produtividade di’ak ba ema hotu”, tenik Dr. Flávio.
Partisipa husi Visereitór, Proreitór, Diretór Nacionais Diretór Jerál, Diretor sira, Pe. Acacio Domingos de Castro, Diretór Ezekutivu FDCH Profesor Julio Aparicio, Diretora Poliklínika Universitaria Dra. Teresa Madeira, funsionariu, estudante, inklui konvidadu sira.
#TimorLeste #UNTL #PoliclínicaUniversitária #MS 21 Dezembru 2023
Média UNTL 📝: Eugenia de Jesus Guterres
Foto 📷: Denilson A. Barros