Universidade Nacional Timor Lorosa'e (UNTL) nia estudante Faculdade de Agricultura (FAGRI), nia Departamento de Agronomia halo peskiza uza amostra batar no modo uza adubu no la uza adubu atu haree diferénsia husi rezultadu produsaun no identifika rai nia bokur.
Iha atividade kolleta ne’ebé hala’o iha Kampus Hera, Díli (24/11), Dekanu Fagri nian, Profesór Vicente de Paulo Correia, hatete, peskiza ne'e importante tebes, tanba lori teoria iha terenu hodi prátika, hodi buka hatene rai nia bokur no rezultadu husi batar ne'ebé sira uza adubu.
"Ha'u hanoin peskiza ne'e importante tebes, tanba estudante sira prátika direta teoria iha terenu no prátika refere nu'udar peskiza kiik ida ne'ebé estudante sira halo durante fulan tolu. Peskiza ne'e apoiu husi ACIAR (Australia Center for Internasional Agriculture Research (ACIAR), hodi buka hatene rai ninia bokur hodi halo produsaun", dehan Dekanu Fagri.
Profesor Marçal Gusmão hanesan orientadór iha peskiza ne’e hatete, peskiza ne'e hala'o iha munisípiu tolu hanesan, Ainaro, Díli no Baucau ho produtu rua modo no batar hanesan amostra.
"Peskiza ne'e ami uza produtu rua hanesan amosta mak modo no batar, peskiza ne'e realiza iha Ainaro, Baucau no Díli inklui Manufahi, no liuhusi peskiza ne'e mak atu identifika rai nia bokur" tenik Profesór Marçal.
Iha fatin hanesan estudante Gil Amaral da Costa nu’udar mós peskizadór hatete, peskiza ne'e hala'o durante fulan tolu ho objetivu hodi haree diferénsia entre utiliza adubu nomós balu la uza adubu nune'e hodi bele identifika rai nia bokur liuhusi batar nia isin di'ak ka la di'ak.
"Peskiza ida ne'e ami hala'o durante fulan tolu hodi hatene diferénsia husi amostra ne’ebé uza adubu no la uza adubu ba produsaun batar, no agora batar sira isin hotu ona, ita bele kolleta ona nomos bele han maibé antes kolleta presiza tetu hodi haree ninia todan" dehan Gil.
Peskizadór sira hamutuk 14, na’in haat peskiza iha Baucau, nain haat iha Ainaro, nain rua iha Hera-Díli no nain rua iha Manufahi, akompaña iha prosesu ne'e, Sr. Alex Peachey husi Toos ba Moris Di'ak (TOMAK), orientadór no estudante sira.
#TimorLeste #UNTL #FAGRI 25 Outubru 2023
Média UNTL 📝: Leonia de A. da Costa
Foto 📷: Laurindo da cruz Gomes