#Timorleste #UNTL #VRAE #CBA #COVID19 #COVID19TL 07 Abril 2022
Universidade Nacional Timor Lorosa’e (UNTL) nia Visereitora ba Asuntu Estudantís (VRAE), Professora Eng.ª Lígia Tomás Correia, M.Sc, hamutuk ho estrutura Kooperativa Brilla Akadémika (CBA) ba dahuluk lansa Kantina CBA nian, hodi loke ba públiku, iha Restaurante Novajar Formosa Díli (06/04).
Relasiona ho eventu ne’e, Konselleira CBA, Profesora Doutora Brígida Antónia Correia hateten, liuhusi lansamentu kantina referebele promove produtu ba dosente, funsionáriu no estudante sira inklui públiku.
‘’Ami-nia objetivu atu halo negósiu iha setór produtivu no agora hahú ho produtu ne’ebé mak ohin oferese hanesan hahan saudável ba vizitante sira, aleinde ne’e, promove membru sira CBA nian liu-liu estudante, finalista sira, no alumni sira, inklui dosente sira ne’ebé pretense hanesan membru CBA nian’’, tenik Profesora Brígida.
Iha fatin hanesan, na’in ba Restaurante Novajar, Sr. Celso Fonseca, hateten, inisiativa loke kantina CBA ne’e tanba primeiru ba estudante sira bele vizita toka, hemu kafé antes atu ba aula.
“Bemvindu ba ita boot sira iha fatin ida ne’e, ohin mós iha espasu ida ne’e ha’u hakarak loke espasu ba alin sira atu bele koko promove imi-nia produtu no kontinua ho kreatividade ne’ebé barak liután hodi fó benefísiu ba CBA”, tenik Sr. Celso.
Prezidente CBA, Sra. Clarina David Lopes, agradese ba Sr. Celso nu’udar na’in ba restaurante tanba bele fo espasu ba sira hodi hala’o negósiu ka atividade CBA nian hodi tau mós produtu CBA nian iha fatin refere.
“Ha’u espera espasu ida ne’e sei la para, maibé iha kontinuidade ba ami, atu bele prodúz nafatin ami-nia produtu mai tau iha fatin ida ne’e atu nune’e produtu sira ne’ebé iha bele fó benefísiu ba ami idaidak’’, dehan Clarina.
Vizitante sira ne’ebé hakarak asesu ba produtu sira CBA nian, bele hakbesik ba Restaurante Novajar iha bairu Formosa, Díli hahú tuku 08h00-10h00 dader.
Média UNTL 📝 : Laurindo da Cruz Gomes
Foto 📷 : Avelino