#TimorLeste #UNTL #FCS #EuropeanUnion #GlobalCampusHumanRights #HumanRightsCentreUNTL #COVID19 #COVID19TL 24 Novembru 2021
Universidade Nacional Timor Lorosa’e (UNTL) nia Magnífiku Reitór, Profesór dr. João Soares Martins, MPH, Ph.D, enkontru ho Embaixadór Uniaun Europeia 🇪🇺 nian iha Timor-Leste, Sr. Andrew Jacobs, no Jestór Projetu Global Campus of Human Rights, Sr. Adriano Remiddi, hodi ko'alia kona-ba futuru ezisténsia Sentru Direitus Umanus (SDU), iha Kampus Kaikoli UNTL nian, Díli (22/11).
Relasiona ho diskusaun refere, Magnífiku Reitór hateten katak, enkontru ne'ebé hala'o parte tolu ko'alia kona-ba atu halo transfere fali Sentru Direitus Umanus mai iha Universidade nia responsabilidade.
“Ohin ita ko'alia kona-ba preparasaun sira atu transfere Sentru ne’e, mai iha UNTL nia responsabilidade tanba dadaun ne’e, sentru ne’e funsiona ho apoiu husi União Europeia maibé iha 2023 ita bele assume ona responsabilidade ida ne'e”, tenik Reitór.
Profesór João mós hatutan, durante ne’e SDU nia atividade la'o hela, no dadaun ne’e mós sira halo hela preparasaun ba Loron Mundiál Direitus Umanus ne’ebé sei selebra iha 10 Dezembru tinan ida ne’e.
Iha fatin hanesan, Embaixador Uniaun Europeia iha Timor-Leste hateten, sira sente kontente tanba bele haree iha ámbitu jerál Sentru iha Universidade no haree mós destaka importánsia kontinuasaun Sentru ne’e iha UNTL no aprendizajen iha área Direitus Umanus nian.
“Hau rona katak, iha UNTL iha kursu hotu-hotu iha maibé parte Direitus Umanus mós importante teb-tebes hodi kontinua oferese posibilidade ba estudante hotu atu estuda Direitus Umanus”, dehan Embaixadór.
Embaixador ne’e mós hatutan tan katak, Uniaun Europeia iha nasaun hotu iha mundu sempre servisu hamutuk, inklui iha Timor Leste hodi fahe valór sira kona-ba Direitus Umanus nian.
Partisipa iha enkontru ne’e, Proreitora ba Asuntu Kooperasaun Profesora Dra. Lídia Gomes, SKM, MPH, Dekanu Fakuldade Siénsia Sosiál, Profesór Camilo Ximenes de Almeida, Diretór Departamentu Relasaun Internasionál, Profesór Bernardo Leto, ekipa tékniku no konvidadu sira.
Média UNTL 📝 : Laurindo da Cruz Gomes
Foto 📷 : Leonia da Costa de Araújo