#TimorLeste #UNTL #FAGRI #DPCM 2 Marsu 2021
Universidade Nacional Timor Lorosa’e (UNTL) nia Fakuldade Agrikultura (FAGRI) liuhusi Departamentu Peska no Siénsia Mariña (DPCM) dezloka estudante na’in haatnulu resin hitu (47) ba iha Munisípiu Likisá, no Hera-Díli hodi hala’o sira-nia prátika durante semana ida (24 fevereiru - 3 marsu 2021).
“Objetivu prátika ida ne’e atu lori estudante sira bá diretamente iha kampu, hodi observa no kompartilla balansu kona-ba koñesimentu teoriku i prátiku, relasiona ho materia ne’ebé hetan iha banku estudu Peskiza no Siénsia Mariña nian”, hateten Diretór DPCM nian, Profesór Mario Viegas Tilman, M.Agr. Neg, iha Kampus Sentrál UNTL nian, Díli (24/2).
Diretór ne’e salienta mós atividade prinsipál seluk hosi prátika lokál refere atu halo mós survei kona ba Zona Ai-parapa nian, atu identifika klasifikasaun biodiversidade, no buka hatene kona ba komunidade nia persepsaun no benefísiu ba ekosistema Timor-Leste nian liga ba moris kuotidiana nian.
“Prátika akadémika ida ne’e foin hala’o ba dahuluk tanba estudante primeiru sira DPCM nian hosi tinan 2018, presiza duni ba observa direta situasaun iha terrenu hodi kompartilla ho siénsia ne’ebé hetan ona”, hatutan Profesór Mário Tilman.
Profesór akresenta tan katak hafoin foti tiha dadus liuhusi survey ne’ebé halo iha terrenu, sei halo rekapitulasaun no analiza ba dadus amostra sira, atu estudante no profesór sira bele aprezenta rezultadu survey ne’e iha nível nasional.
“Programa ne’e importante tebes dezeja sira bele aprende no aumenta sira-nia koñesimentu hodi prepara an ho kualifikadu bainhira akaba ira nia estudu, sira bele aplika ona matenek ne’ebé iha “, tenik Profesór Tilman.
Prátika no survey refere implementa tanba kooperasaun di’ak entre UNTL ho Pograma Nasaun Unidu nian ba Dezenvolvimentu (UNDP). Enkuantu kolokasaun estudante sira iha terrenu distribui ba grupu 9, desloka tuir grupu ba fatin destinada sira mak Lagoa Maubara, suku Ulmera no Hera-Díli.
Média UNTL 📝: Altur Ramos (estajiáriu)
Foto 📷: Altur Ramos (estajiáriu), Arkivu DPCM