#UNTL, 30 janeiru 2019
Universidade Nacional Timor Lorosa’e (UNTL), iha Dili, iha ninia konjuntu bibliotekas kompostu hosi Biblioteka Sentral, temporariamente lokaliza hamutuk ho INFORDEPE, iha Balide, no mos biblioteka ualu (8) tan lokaliza iha fakuldade ida-idak nia resintu laran.
Diretór Nasionál Biblioteka Sentral, Sr. José Francico Lourdes hateten katak UNTL iha biblioteka sentrál ida ho biblioteka kada fakuldade no hamutuk hotu sia (9).
“Iha biblioteka sentrál ne’e iha livrus hotu, no balun maka aloka ona ba fakuldade sira. Hafoin ita kontrola de’it. Universidade planeia sei sosa tan livru”, hatete mos Diretór.
Diretór haktuir tan katak livru sira ne’ebé biblioteka sia (9) UNTL nian akumula, hamutuk rihun limanulu atus rua hitunulu resin rua (50,272).
Estudante UNTL, Maguida Pacheco de Andrade, hateten nia prefere estuda no asesu ba iha Biblioteka Sentral iha Balide tanba bele hetan referénsia ba traballu akademiku sira.
Estudante ne’e haktuir mos katak fatin ne'e seguru ona no livru sufisiente maske sei presiza tan aumenta livru iha área espesifiku sira.
Média UNTL/ Estajiária: Emerenciana
Foto: Miguel Gonçalves