#UNTL, 28 janeiru 2019
Estudante sira tinan letivu 2019, ne'ebe hetan ona asesu ba universidade nasional UNTL liuhosi Kanál A Rejime Jeral, no Kanál C Rejime Oportunidade, ne’ebé aprovadu husi Ministériu Ensinu Superiór, Siénsia no Kultura (MESSK) hahu rejistru daudauk ona iha UNTL.
Prosessu rejistrasaun ba alunos UNTL foun 2019 nian, sei halao durante loron hat (4) deit, hosi segunda feira loron 28 janeiru to’o kinta feira loron 31 janeiru 2019, iha kampus Centrál.
Diretór Nasionál Atendimentu Estudante (DNAE) Rui Loco Pires, iha Kampus Sentral, Dili, esplika ho detallu prosesu rejistrasaun ba estudante sira foun tuir faze haat.
Dahuluk, estudante sira tenki ba foti formuláriu no tenki hatudu sira-nia Númeru Ezame Nasionál no fó hatene pasa iha departamentu.
Daruak, estudante sira sei foti resibu iha Departamentu Finansas UNTL nian hodi ba halo pagamentu iha Banco BNCTL, iha kualker ajensia BNCTL ne’ebé ezisti iha Timor-Leste rai laran tomak.
Datoluk, estudante sira hafoin selu iha Banco BNCTL sei foti KRS, no entrega resibu pagamentu husi banku ba iha Akadémika, iha Kampus Sentral.
Dahaat, ka ikus liu mak kada estudante entrega kópia sertidaun RDTL tahan ida.
Ba prosessu rejistrasuan iha mos nia kustu rasik no diretór esplika katak estudante sira hala’o rejistrasaun kada estudante ida sei selu totál dolar Ualu-nolu-resin-hitu ($87).
“Dolar rua-nolu ($20) ba manutensaun edifisiu, dolar rua-nolu-resin-walu ($28) ba Kazaku Alma Mater, no dolar tolu-nolu ($30) selu ba Propinas Semestre ida, inklui Orientasaun (ordik) $ 9”, dehan Diretór Rui Loco Pires.
Diretór esplika no refere tan katak DNAE sei hala’o atendimentu loron haat (4) deit ne'e duni apela ba estudante sira hotu ne’ebé liu ona hosi kanál A no C atu kompleta sira nia rejistrasaun atu la bele lakon fatin entrada ba estuda iha UNTL iha ano letivu 2019 nian.
Média UNTL
Foto: Maria Isabel