Universidade Nacional Timor Lorosa’e (UNTL) nia Prezidente Asosiasaun Akadémika Estudantíl Faculdade de Direito nian Cristovão de Araújo Mau-to hanesan mós Senadu Jerál estudante nian, iha Kampus Sentral UNTL nian, Dili (21/02) hateten, planu prioridade senadu nian ba 2024 fahe ba parte rua (1) preparasaun orientasaun akadémika no (2) organiza eleisaun ba estrutura asosiasaun akadémika estudantil ba períodu 2024-2026.
“Atividade sira-ne’e ami prepara no koordena ho estrutura universidade atu haree no organiza orientasaun ba estudante foun sira atu la’o ho di’ak no susesu, tanba senadu nia papel iha universidade atu ajuda no haree problema estudante nian hodi hato’o ba iha fakuldade no universidade”, dehan Senadu Jerál Estudante nian.
Cristovão de Araújo mós hatutan, sei kria eventu balu iha fakuldade hodi selebra ezisténsia fakuldade nian no kria mos atividade estra hodi envolve estudante sira bele kontribui ba dezenvolvimentu talentu estudante nian.
“Ami kria atividade hanesan desportu, diskursu, debate, poezia hodi envolve estudante sira atu hasa’e sira-nia kapasidade no abilidade no ikus mai bele kontribui ba dezenvovimentu estudante nian”, dehan.
Tinan ida ne’e Assosiasaun Akadémika Estudantil iha kada fakuldade sei remata sira-nia mandatu iha fulan juñu 2024 no iha tempu badak sei hala’o eleisaun ba kandidatu estrutura foun ba períodu 2024-2026.
