Universidade Nacional Timor Lorosa’e (UNTL) nia Proreitora ba Asuntu Provedoria no Akonsellamentu (PRAPA) Profesora Teresa de Jesus Vaz Cabral, iha Kampus Sentral UNTL nian, Díli (26/01), hatete Uma Akonsellamentu ne’ebé mak existe iha universidade rejista ona kliente hamutuk nain sanulu resin neen (16).
“Dadaun ne’e ita nia uma akonsellamentu rejistu ona ema hamutuk nain 16, mak mai husu atu akonsella no sira mai ho ida-idak nia problema. Iha ne’e Ita iha Amu Kapelaun Pe. Nivio Lebre Correia,Fdcc mak disponivel tebes hodi atende ba kualker asuntu no ha’u mós sempre akonsella karik problema mak sira hasoru la presiza ba iha Amu”, dehan Profesora Teresa.
Profesora Teresa hatutan, problema ne’ebé rejistu mak kona-ba asuntu estudu nian no balu ne’ebé mai ho problema seluk, PRAPA sempre prontu nafatin atu atende ba Sivitas Akadémika tomak.
“Agora dadauk ami tau ona iha ami-nia planu, sei halo sosializasaun ba estudante foun sira ne’ebé agora atu tama kona-ba funsionamentu Uma Akonsellamentu no ami mós prepara ona hodi tun direta ba iha kada fakuldade no departamentu hodi esplika atu estudante no funsionariu sira bele komprende di’ak, tanba dalabarak husu deit reprezentante mak mai maibé bainhira sira remata sira la fahe informasaun ba kolega sira seluk”, dehan.
Uma Akonselamentu ne’ebé lokaliza iha Kampus Sentral UNTL nian, disponivel durante oras servisu nian hahú husi segunda to’o sesta hodi fó atendimentu iha parte akonsellamentu nian ba sivitas akadémika universidade (estudante, funsionáriu no dosente).
#TimorLeste #UNTL #PRAPA 29 Janeiru 2024
Média UNTL 📝: Laurindo da Cruz Gomes
Foto 📷: Eugenia de Jesus Guterres