Universidade Nacional Timor Lorosa’e (UNTL), nia Poliklínika Universitáriu (PU) realiza formasaun ba pesoál tékniku Laboratóriu uza mákina DRI-CHEM NX600, ne’ebé uza halo teste kímiku hodi deteta tipu moras sira, iha Kampus Sentral Díli (23/01).
Pesoál téknika laboratáriu Liliana Maria da Costa Freitas, agradese ba Instituto Laboratório Nacional ne’ebé oferese formasaun uza mákina DRI-CHEM NX600 hodi halo teste ba moras sira hanesan aten, kolestrol, diabetes, no asam urat.
“Liuhusi formasaun ida-ne’e bele fasilita utiliza mákina ne’ebé foun bele ajuda ona ha’u oinsá atu uza mákina DRI-CHEM NX600 hodi halo teste kímiku, hodi deteta moras sira hanesan aten, kolestrol, diabetes, no asam urat”, dehan Liliana.
Tuir Tékniku Instituto Laboratóriu Nacional (LABNAS) José Gonçalves Moniz hateten, formasaun ne’e hodi halo operasaun, instalasaun, no manutensaun ba mákina DRI-CHEM NX600 hodi deteta moras sira.
“Formasaun ida ne’e atu mellora pesoál tékniku sira-nia koñesimentu ba funsionamentu ba mákina ida-ne’e no halo prátika direita ba mákina DRI-CHEM NX600 hodi halo teste kímiku hodi deteta moras sira hanesan diabetes, kolestrol, aten no asam urat”, dehan José.
