Universidade Nacional Timor Lorosa’e (UNTL), nia Faculdade de Engenharia Ciência e Tecnologia (FECT) liuhusi Departamento de Eletrónica e Elétrica (DEE) nia estudante finalista Francisco Lelo Bere aprezenta rezultadu peskiza kona-ba esperimenta “Sistema ense bee iha botir plástiku no taka botir nia matan automátiku kontrolu husi mákina PLC (Programmable Logic Controller)”.
“Ha’u-nia tópiku husi traballu ne’e mak Sistema ense bee iha Botir/Aqua no taka matan automátiku kontrola husi PLC (Programmable Logic Controller) ho objetivu utiliza PLC hodi halo kontrolu automatiku ba iha sistema refere.
Peskiza ne’e uza métodu estudu laboratóriu, planeamentu sistema no testa ba sistema ho durasaun fulan tolu. Instrumentu ne’ebé utiliza mak mákina PLC, matéria eletrónika, eletrika, mekánika , aqua mamuk no bee”, tenik Lelo Bere, hafoin remata nia aprezentasaun iha lokál ezame Laboratóriu DEE-FECT Hera, Díli (12/01).
Estudante ne’e mós hatutan rezultadu ne’ebé nia hetan iha peskiza refere mak bee ne’ebé ense iha botir plástiku (aqua mamuk), taka tiha matan, koloka aqua ba kaixa bele kontrola husi aparellu PLC no nia implementasaun bele uza iha indústria fabrika aqua.
“Rezultadu ne’ebé atinje kompremete iha ha’u-nia planu atu dezenvolve di’ak liután no iha futuru hodi kontribui ba indústria ne’ebé iha relasaun ho nia esperiénsia. Liuhusi estudu ne’e mós bele kompleta ha’u-nia traballu finál kursu nian (Monografia)”, dehan nia.
Dosente orientadór Profesór Reinaldo Guterres da Cruz informa, estudante nia tópiku ne’e importante loos, tanba Timor-Leste foin ukun aan seidauk iha indústria, maibé agora iha hela faze dezenvolvimentu, espera iha futuru estudante ne’e bele implementa saida mak sira aprende.
“Tópiku ida-ne’e importante liu, tanba Timor-Leste foin ukun aan, seidauk iha industria maibé agora tama dadauk ona, tanba ne’e espera katak iha futuru estudante ne’e rasik bele implementa koñesimentu hirak ne’e iha sosiedade”, dehan Profesór Reinaldo.
Profesór ne’e mós husu ba estudante sira, atu aprende di’ak liután, tanba atu hatene buat hirak ne’e la fasil, liu-liu oinsá kria mákina ida-ne’e, importante mak tenke buka aprende mesak ho meiu oioin ne’ebé iha.
#TimorLeste #UNTL #FECT #DEE 17 Janeiru 2024
Média UNTL 📝: Domingos Amaral
Foto 📷: Agostinho da Cruz