Universidade Nacional Timor Lorosa’e (UNTL), liuhusi Visereitór Assuntu Akadémiku (VRAA), Profesor Câncio Monteiro, Ph. D, hamutuk ho Proreitór Assuntu Informatizasaun, Transformasaun Digital no Inovasaun (PRAITDI), Profesór Eng. Frederico Soares Cabral, M.Eng, diskute kona-ba dezenvolvimentu no jestaun repozitóriu monografia.

VRAA Profesor Câncio Monteiro, Ph.D, subliña katak implementasaun repozitóriu monografia iha universidade sai meiu importante ida atu organiza, sistematiza no fasilita asesu ba dokumentu akadémiku estudante sira.

“Repozitóriu ida-ne’e importante tebes atu sistematiza no dijitaliza dokumentu akadémiku, liuliu monografia estudante sira, hodi fasilita asesu ba informasaun no servisu akadémiku. Tanba ne’e, presiza iha koordenasaun no kooperasaun entre universidade no fakuldade sira, tanba sistema ida-ne’e la’ós de’it kona-ba teknolojia, maibé mós kona-ba jestaun no partilla informasaun akadémiku”, nia hateten.

Iha fatin hanesan, Proreitór PRATIDI, Profesór Eng. Frederico Soares Cabral, M. Eng, hateten sistema dijital fasilita organizasaun, armazenamentu no asesu ba monografia estudante sira, hodi apoia atividade akadémika no peskiza.

“Repozitóriu monografia sei ajuda ita atu rai no organiza rezultadu akadémiku estudante sira iha forma dijital, fasilita asesu ba informasaun no prezerva koñesimentu ne’ebé universidade produz.

Ita sei kontinua servisu hamutuk ho fakuldade no unidade sira atu dezenvolve sistema ne’ebé responde ba nesesidade universidade, ho apoiu tékniku no formasaun ba ema sira ne’ebé sei uza sistema”, nia hateten.

Partisipa husi Visedekanu sira, Diretór sira, Xefe Departamentu, funsionáriu no ekipa téknika.