Universidade Nacional Timor Lorosa’e (UNTL), liuhusi Faculdade de Agricultura (FAGRI), nia Departamento de Saúde Animal (DSA) servisu hamutuk ho ekipa militár husi Estadus Unidus América (US Navy) organiza workshop kona-ba kontrolu no tratamentu moras animál, iha Salaun-Enkontru FAGRI-Hera, Díli (17/08).
Visediretór DSA, Prof. Alípio de Almeida, hatete katak kooperasaun entre DSA no ekipa veterinária hosi Estadus Unidus ne’e hala’o kada tinan, liuhusi atividade workshop no partilla koñesimentu kona-ba atendimentu no tratamentu ba animál sira.
“DSA iha kooperasaun ho US Navy, liuliu iha área veterinária. Kada tinan sira mai halo workshop hanesan ne’e, no halo atendimentu kurativu ba animál sira ne’ebé moras. Maibé, tinan ida-ne’e sira mai fahe de’it informasaun, tanba sira mai ho aviaun no labele lori fasilidade sira atu halo prátika”, hatete Profesór Alipio.
Iha momentu hanesan, Kapitaun Andrea Lin husi US Navy hatete katak, nia no ekipa kontente tebes, tanba bele fahe esperiénsia ho estudante no profissionál sira iha área veterinária.
“Ami kontente tebes. Ida-ne’e esperiénsia di’ak no nasaun Timor-Leste furak tebes ami mos gosta tebes hasoru profisionais veterinária sira no aprende kona-ba servisu ne’ebé sira halo iha-ne’e. Ami mos bele aprende kona-ba prátika veterinária iha Timor-Leste”, hatete Kapitaun Lin.
Partisipa hosi Kapitaun Alicia Tutino ho militár sira, dosente no estudante Departamentu Saúde Animál -FAGRI.
