Universidade Nacional Timor Lorosa’e (UNTL) nia Vice-Reitór para os Assuntos Académicos Profesór Câncio Monteiro Ph. D halo abertura workshop ho tema “1a Edição do workshop da revisão dos sílabos da Língua Tétum” ne’ebé organiza husi Direção Académica das Unidades Curriculares Transversais (DUCT) servisu hamutuk ho Instituto Nacional Linguística (INL), iha Auditorium FEG, Díli, (30/07).

“Husi workshop ida-ne’e hodi halo diskusaun ne’ebé kle’an no krítiku ba konteúdu sílabus nian hodi tulun dosente transversais sira iha koalia públiku, hakerek tuir padraun INL no metodolojia prátika iha sala de aula ba prosesu ensinu nian. Nune’e bele produz estudante ne’ebé kualidade iha área lian Tetun nian.
Ha’u enkoraja DUCT atu labele para de’it iha língua Tetun, maibé presiza habelar mós atividade formasaun, atualizasaun no padronizasaun ida-ne’e ba matéria transversál sira seluk iha universidade”, Dehan Profesór Câncio.

Diretora DUCT Profesora Cipriana Santa Brites hatete, workshop ne’e hodi fó formasaun ba dosente transversais sira kona-ba uniformizasaun sílabus ne’ebé uza ba prosesu ensinu aprendizajen dalen Tetun iha fakuldade sira.

“Workshop ne’e hanesan edisaun dahuluk atu partilla ideia bázika oinsa bele dezenvolve nafatin manorin sira-nia kapasidade iha metodolojia ensinu nune’e bele tulun estudante sira hodi entende di’ak lian Tetun.
Liuhusi formasaun ne’e bele tulun manorin sira hodi mellora di’ak liutan Kurríkulu Padraun Nasional ne’ebé adapta tuir ezijensia INL nian hodi hetan koñesimentu, nune’e dezenvolve kapasidade nu’udar manorin di’ak iha lian Tetun nian”, Dehan Diretora Brites.

Partisipa husi Diretora INL, Profesora Rosa da Costa Tilman ho ekipa, Vise-dekanu, no dosente transversais sira.