Universidade Nacional Timor Lorosa’e (UNTL) liuhusi Gabinete Vise Reitora para os Asuntos Estudantís (GVRAE) nia funsionáriu hamutuk na’in-13 partisipa iha formasaun “Money Minded Roadmap” iha Suku Lauhata, Postu-Administrativu Bazartete, Munisipiu Liquiça.

Visereitora VRAE Profesora Doutora Bia Ble Hitu Carvalho de Jesus, hato’o agradese ba formador sira, tanba bele fó tempu hodi fasilita formasaun ne’e ba funsionáriu GVRAE nian.

“Formasaun ne’e hala’o ho objetivu atu kapasita koñesementu funsionáriu sira-nian hodi jere rasik sira nia osan no oinsa halo planu ba futuru hodi atinje mehi sira tuir osan ne’ebé iha no ba oin ita sei organiza atu fasilita tan formasaun ne’e ba funsionáriu UNTL nian”, Dehan VRAE, iha Liquiça (09/10).

Iha fatin hanesan Formadór Pedro Ximenes husi ANZ ba programa Money Minded sente orgullu, tanba bele hetan opurtunidade atu partilla fali koñesementu ba funsionáriu sira.

“Materia ne’ebé ohin partilla atu oinsa bele haree ba ita-nia planu sira hodi halo poupansa ba ita-nia gastus sira no liuhusi formasaun ida ne'e, ami espera funsionáriu sira bele hatene ona utiliza sira-nia saláriu ba presiza tuir planu”, Dehan Pedro.

Rosa de Lima B. Corte-Real nu’udar funsionária GVRAE nian sente orgullu ho formasaun ne’e, tanba bele aumenta tan koñesementu iha oinsa halo planu ba futuru no oinsa atu poupa osan hodi atinji mehi.

“Durante ne’e ita iha osan maibé ita lahatene oinsa atu jere ho di’ak ba ita nia presiza, liuhusi formasaun ne’e fasilita tebes atu ita bele halo poupansa rasik ba ita-nia osan hodi uza kuidadu no labele gastus arbiru hodi atinji ita-nia mehi sira ne’ebé ita hakarak. Ita atu loke negósiu no sosa motor ka kareta Ita tenki hatene oinsa halo poupa hodi atinje hakarak sira-ne’e”, Dehan Rosa.