Universidade Nacional Timor Lorosa’e (UNTL) nia Direção Nacional Recurso Humano (DNRH) servisu hamutuk ho Policlínica Universitária (PU) kontinua tau atensaun ba funsionáriu públiku sira ne’ebé moras.

Xefe Departamento Prosesu Disiplinar Sr. Quintino da Costa hatete, DNRH ho PU sempre halo vizita hodi haree direta funsionáriu sira ne’ebé moras atu bele hatene no identifika sira-nia kondisaun saúde.

“Vizita ne’e ami halo bazeia ba relatóriu no dadus ne’ebé mai husi fakuldade no ami koordena hamutuk ho PU hodi vizita direta iha rezidénsia funsionáriu sira-nian. Nune’e bele hatene sira-nia kondisaun saúde, hodi bele fó rekomendasaun ba halo tratamentu intensivu”, Dehan Sr. Quintino iha Kampus Sentral, Díli (23/09)

Xefe Departamentu ne’e mós hatutan, funsionáriu públiku sira ne’ebé mak DNRH ho PU halo kontrolu saúde, balu rekupera ona no falta na’in-5 mak moras komplikadu ne’ebé presiza tempu atu halo tratamentu.

Iha parte seluk Diretór Policlinica Universitária dr. Artur Natalino Corte Real Araújo hatete, parte poliklínika prontu halo atendementu ba funsionáriu, dosente no estudante sira tuir nesesidade ne’ebé iha.

“Vizita ne’e ami hala’o bazeia ba pedidu husi DNRH hodi halo identifikasaun ba funsionáriu sira ne’ebé moras, hafoin dadus sira ne’e ami submete ba DNRH atu bele halo prosedimentu tuir lei ne’ebé iha, ami mós fó konsulta ba funsionáriu sira ne’ebé moras maibé sira ne’ebé moras konplikadu sei rekomenda ba doutor espesialista husi HNGV hodi hetan tratamentu intensivu”, Dehan dr. Artur.

Profesór Artur akresenta, dadaun ne’e bazeia ba dadus husi moras ne’ebé identifika ona, PU prepara ona planu hodi aumenta ai-moruk no reajente atu bele fó atendementu ba sívitas akadémika tuir nesesidade.

Atividade vizita ne’e iha tinan kotuk hala’o ba iha Munisípiu Baucau no Bobonaro no iha tinan ida ne’e hala’o iha Díli ba iha parte Becora, Kaikoli, Bebonuk, nomós depende ba rezidénsia husi pasiente sira.