Universidade Nacional Timor Lorosa'e (UNTL), liuhusi Faculdade de Turismo Artes Industrias Criativas e Culturais (FTAICC), entrega estudante Estajiu Servisu Sosial (ESS), na'in lima nulu resin ida (51), ba Autoridade Lokál Suku Com, Postu-Administrativu Lautem, Munisípiu Lautem.
Iha diskursu Dekanu FTAICC, Profesór Dr. Feliciano Quintas do Ceú dehan, estudante halo Estájiu Servisu Sosial iha suku ne'e hamutuk na'in 51, husi Departamento de Comérsio Turismo.
"Ami fiar katak, estudante 51 ne'e sei koopera hamutuk ho xefe suku ho nia estrutura no funsionáriu sira, nune'e atividade ne'ebé ita hakarak bele realiza ho di'ak, liuliu atividade prinsipal sira hanesan produs mapamentu turístiku nian”, hateten Dekanu FTAICC iha Sede Suku Com (22/07).
Iha sorin seluk Xefe Suku Com, Sr. Sergio José Cristovão, agradese ba universidade liuliu FTAICC ne’ebé bele defini Suku com sai fatin ba estájiu, nune'e bele ajuda halo mapamentu suku nian nomós bele hanorin komunidade hodi fasilita oinsá bele simu baiñaka sira.
"Agradese bele hili suku ne’e sai hanesan fatin ba estájiu. Ami garante no asegura estudante sira bele remata estájiu ho di'ak. Ami mós iha programa suku nian ne'ebé bele enkaixa, nune'e bele halo dezenvolvimentu turismu ba Suku Com liuliu iha Munisípiu Lautem”, Tenik Xefe Suku.
Iha fatin hanesan, reprezentante Koordenadór Estudante ESS, Dionisio da Costa Guterres hateten, ESS ne'e atu aplika no prátika relasiona ho teória ne'ebé aprende.
"Iha ESS ne'e ami sei implementa programa sira mak hanesan, halo mapamentu turístiku suku nian, fó formsasaun ba estudante sira kona-ba lian Português no Inglés, nomós ami sei halo sosializasaun ba hospitalidade liuliu ba komunidade sira ne'ebé maka investe iha guest house”, dehan.
Aleinde atividade ne'e estudante no akompaña husi dosente oriendór sira, hala'o vizita ba iha fatin turizmu Lagoa UMUN-IRA ne'ebé lokaliza iha Suku Com.
Estájiu Servisu Sosial (ESS) ne'e, hala'o durante fulan rua (2) hahú husi loron 22 fulan Jullu to'o fulan Setembru, kompostu husi grupu rua (2), grupu (1) na'in 25 no grupu (2) (26).
Partisipa husi Dekanu ho nia estrutura, Dosente Orientadór sira, Xefe Departamento de Media e Comunicação, Sra. Adelaide Maria Filipa da Cunha, Dosente, Funsionáriu husi Autoridade Suku nian no estudante sira.
