Universidade Nacional Timor Lorosa'e (UNTL), liuhusi Faculdade de Engenharia Ciência e Tecnologia (FECT), nia Departamento de Geologia e Petróleo (DGP), hetan re-avaliasaun ba II síklu husi Agência Nacional para Avaliação e Acreditação Académica (ANAAA).
Visereitór ba Asuntu Akadémiku, Profesór Câncio Monteiro, dehan avaliasaun I síklu hahú iha tinan 2019, no bazeia ba rekomendasaun sira ne'ebé ANAAA hato'o, parte universidade nafatin disponivel ba kualker deskobrimentu no prontu konsidera no simu nune'e bele mellora departamentu ba oin.
"Universidade prontu no konsidera ba rekomendasaun husi ANAAA liuliu ekipa avaliadór sira, maibé ha'u fiar katak liuhusi aprezentasaun ne'ebé halo bele konvense avaliadór sira. Ita sei bele hetan rezultadu ne'ebé di'ak." Dehan Visereitór Monteiro iha KampusFECT-Hera, Díli (20/07).
Iha sorin seluk, Diretór Ezekutivu ANAAA, Dr. Nilton Diamantino Paiva Mau hatete, Departamento de Geologia iha tinan 2019 halo avaliasaun primeiru hetan valor C, no bazeia ba rekomendasaun ANAAA, iha área rekursu umanu, learning outcome no peskiza ne'ebé departamentu halo.
"Bazeia ba aprezentasaun ne'ebé DGP halo ita haree iha progresu bo'ot kompara ho tinan 5 liubá, liuliu iha área rekursu umanu no husu ba departamentu atu nafatin haka'as an hatudu kualidade hodi oferese ba estudante sira", hateten Dr. Nilton.
Iha fatin hanesan Vise-Diretór DGP, Profesór Cornelio Cardoso Moniz hatete, avaliasaun ne'e importante nune'e bele hatene frakeza ne'ebé kursu ne'e enfrenta.
"Avaliasaun ne'e importante atu hatene frakeza departamentu nian, nune'e bele hasa'e liután kualidade. Ami fiar katak DGP bele hetan nota ne'ebé di'ak liu iha tinan hira liubá, tanba ita iha progresu ne'ebé bo'ot liuliu iha rekursu umanu, peskiza no infraestrutura", Tenik Profesór Cornelio.
Iha Re-avaliasaun ne'e hetan avaliadór husi nasionál no internasionál hamutuk na'in tolu (3), mak hanesan, Profesór Dr. Ahmad Yasir, Sr. Gregorio Pires no Sra. Santiana Maria Fátima Jeronimo.
Partisipa husi Proreitór ba Asuntu Garantia Kualidade, Profesór Ruben Jerónimo Freitas, Dekanu FECT Profesór Adalfredo Ximenes, Vise-Dekanu sira, Ekipa Avaliadór, Dosente, Funsionáriu husi DNAA-GQI, Alumni, no Estudante sira.
