Universidade Nacional Timor Lorosa’e (UNTL) nia estudante Benjamin Geovánio Matos eleitu nu’udar Prezidente Ezekutivu ba Asosiasaun Akadémika Estudante (AAE) Faculdade de Educação e Humanidades (FEH), liuhusi eleisaun ne’ebé realiza iha loron Sesta-Feira, 17 fulan Jullu tinan 2026.
Iha entrevista Benjamin agradese ba konfiansa no responsabilidade ne’ebé simu husi estudante sira, tanba ne’e kompromete hodi implementa programa importante sira hanesan, asuntu akadémika, infraestrutura, kapasitasaun estudante no seluk tan.
“Ami kompromete katak ami sei luta ba problema akadémiku, infrestrutura, hanesan haris-fatin, Ac, Sala de Aula, Wifi la funsiona, inklui ami sei fasilita formasaun, kursu, semináriu no kompetisaun desportivu, arte, múzika no kultura. Ami hakarak estudante FEH la’ós matenek de’it, maibé mós hola parte iha kapasitasaun sira”, dehan Benjamin iha Kampus Liceu, Díli.
Prezidente Komisaun Organizadora, Eugenio Soares Tilman, hato’o parabéns ba senadu eleitu iha FEH ba mandatu 2026-2028, espera bele reprezentante estudante sira iha kualkér momentu hodi hadia no defende estudante sira-nia direitu.
“Objetivu husi eleisaun ne’e atu troka estrutura tuan ba estrutura foun, tuir loos mandatu anterior remata iha fulan Maiu tinan 2026. Maibé ita foin realiza. Tanba ne’e parabéns ba senadu eleitu, espera husi mandatu ba tinan 2026-2028, imi bele lidera ho di’ak liuliu rona no defende estudante sira nia direitu”, dehan Prezidente Komisaun.
