Universidade Nacional Timor Lorosa’e (UNTL), liuhusi Faculdade de Agricultura (FAGRI), ho parseria Peskiza kona-ba produtividade servisu iha setór agrikultura, hala’o workshop hodi aprezenta rezultadu peskiza iha Munisípiu Ainaro, Manufahi no Baucau.
Dekanu Interinu FAGRI, Prof. Graciano Soares Gomes, hatete katak workshop ne’e iha objetivu atu aprezenta rezultadu peskiza ne’ebé hala’o ona no avalia impaktu ba dezenvolvimentu setór agrikultura iha Timor-Leste.
“Loron ohin ami aprezenta rezultadu peskiza ne’ebé hala’o tiha ona. Peskiza balun envolve estudante sira atu sai hanesan sira-nia obra monografia. Ami buka métodu no variedade ida ne’ebé di’ak liu atu bele rekomenda ba agrikultór sira iha Timor-Leste, hodi hasa’e produtividade no promove sustentabilidade iha setor agrikultura”, hatete Prof. Graciano iha Salaun Enkontru FAGRI, Hera Díli (28/07).
Reprezentante ACIAR iha Timor-Leste Dr. Penny Wurm hatete, informa projetu peskiza ida-ne’e envolve parseiru prinsipál haat, mak Universidade Nacional Timor Lorosa’e (UNTL), Charles Darwin University (CDU), Ministériu Agrikultura, Pekuária, Peska no Florestas (MAPPF) no organizasaun independente To'os Servisu Kma’an (TOSKA).
“Universidade rua, mak UNTL no CDU, lidera atividade peskiza no envolve mós estudante sira atu aprende diretamente husi projetu. MAPPF sei uza rezultadu peskiza atu apoia formulasaun polítika ne’ebé bazeia ba evidénsia sientífika, enkuantu TOSKA fasilita koordenasaun entre parseiru sira no hametin relasaun ho komunidade agrikultór”, nia hatete.
Nia aumenta tan katak projetu ne’e mós hetan apoiu husi Instituto Dom Bosco, ne’ebé fó formasaun no manutensaun ekipamentu.
Workshop ne’e realiza durante loron tolu 27 to’o 29 Jullu 2026 hodi aprezenta rezultadu estudu ne’ebé hala’o ona husi Departamento de Agronomia, Siénsia Solo no Sósiu-Ekonomia.
Partisipa husi peskizadór sira, ekipa ACIAR, reprezentante TOSKA, Ministériu Agrikultura, Pekuária, Peska no Florestas (MAPPF), dosente, estudante no konvidadu sira.
