Universidade Nacional Timor Lorosa’e (UNTL), nia Magnífiku Reitór Prof. Dr. Joviano António da Costa, M.Eng., asina Memorandu de Entendimentu (MoU) ho reprezentante husi Fakuldade Siénsia Desportiva no Saúde, Universitas Negeri Surabaya (UNESA) Indonézia, Prof. Dr. Nurkholis, M.Pd., iha Auditóriu Faculdade de Economia e Gestão, Díli (16/10).

Reitór hatete katak; oportunidade ida-ne’e, UNTL asina Memorandu Entendimentu ho UNESA, liuhusi Departamento de Ensino da Educação Física e Desporto (DEEFF), atu hametin kooperasaun no apoiu ba dezenvolvimentu departamentu ne’e.

“Ba oin instituisaun rua sei servisu hamutuk iha área peskiza, servisu komunidade no dezenvolvimentu akadémiku. Kooperasaun ne’e sei inklui mós dezenvolvimentu modalidade desportiva pétanque.

Ita hein katak UNESA bele kontribui ba dezenvolvimentu DEEFF, atu departamentu ne’e bele fó kontribuisaun ba jerasaun foun sira, la’ós de’it iha área desportu, maibé mós iha promosaun saúde no edukasaun ba moris saudável”, Dehan Reitór.

Prof. Dr. Nurkholis, M.Pd., hatete katak implementasaun husi akordu ne’e sei fó foku ba edukasaun, peskiza no dezenvolvimentu desportu.

“Inisiativa ida-ne’e sai nu’udar pasu konkretu ida atu hametin kolaborasaun entre UNESA ho UNTL, liuliu iha área edukasaun, peskiza no dezenvolvimentu desportu. Obrigadu barak, tanba simu no oportunidade ne’ebé fó mai ami atu fahe esperiénsia no dezenvolve kooperasaun entre instituisaun rua ne’e”, hato'o nia.

Eventu refere akompaña husi Diretor Académico do Departamento de Ensino da Educação Física e Desporto (DEEFF), Faculdade de Educação e Humanidades mestre João Dias Pereira.

Partisipa husi wakil Dekan Fakultas Vokasional UNESA, Prof. Dr. Abdul, ho ekipa, dosente no estudante sira.