Universidade Nacional Timor Lorosa’e (UNTL) liuhusi Gabinete Vice-Reitória Para os Assuntos Estudantís (GVRAE) servisu hamutuk ho Associação de Defesa dos Consumidores de Timor-Leste, sensibiliza protesaun no direitu komsumidor ba estudante sira, iha Auditórium FEG nian, Díli (16/07).
Iha diskursu VRAE Profesora Bia Ble Hitu Carvalho de Jesus hatete, atividade ne’e atu partilla ba estudante sira kona-ba direitu komsumidór no hodi garante komsumidór iha direitu atu deside, atu sosa sasan ne’ebé sira presiza.
"Objetivu husi atividade ne’e atu halo sensibilizasaun ba estudante sira kona-ba direitu no dever konsumidór nian. Aleinde ne’e, estudante sira bele komprende oinsá sai konsumidór ne’ebé responsavél no konsiente iha sira-nia moris lorloron.
Espera katak estudante sira bele kontinua fahe informasaun ne’e ba sira-nia família no komunidade, hodi aumenta konsiénsia kona-ba protesaun konsumidór", Dehan VRAE.
Iha fatin hanesan, Prezidente Associação Tane Consumidor de Timor-Leste Sr. Robin de Araújo hatete, instituisaun sei kontinua halo sosializasaun atu fahe informasaun ba públiku, refleta Lei n.º 8/2016 regula protesaun komsumidór.
"Objetivu atu aumenta koñesimentu estudante sira-nian kona-ba direitu ne’ebé konsumidór hotu iha bainhira sosa produtu ka uza produtu. Programa ne’e la’ós deit ba universidade sira, maibé ba mós estudante eskola sekundária sira, tanba atividade dahuluk sei hala’o iha Díli, depois sei estende ba munisípiu sira atu nune'e komunidade sira bele komprende no asesu informasaun kona-ba protesaun ba komsumidór no garante seguru", Dehan Sr. Robin.
Entretantu estudante Juliana da Silva Monteiro, husi Faculdade de Economia e Gestão (FEG) sente orgullu, tanba bele hetan informasaun kona-ba oinsá komsumidór sira hatene sira-nia protesaun no direitu.
"Atividade sensibilizasaun ne'e fasilita tebes ami atu labele sai vítima ba empreendedór sira ne'ebé faan sasan, dalaruma sasan ne'e tau ho folin ne'ebé baratu, maibé ita uza laiha kualidade. Liuhusi sensibilizasaun ida ne'e bele hasa'e ami-nia koñesimentu kona-ba direitu no dever konsumidór nian, liuliu ami mós bele partilla informasaun ne’e ba família no sosiadade”, Dehan Juliana.
