Universidade Nacional Timor Lorosa’e (UNTL), nia Magnífiku Reitór, Prof. Dr. Joviano António da Costa, M.Eng., ho Ms. Evelyn Sun General Manager SuperMap International, kompañia SuperMap Software husi Xina asina Memorandu of Understanding (MoU), hodi hametin kooperasaun iha área teknolojia geospatial, edukasaun no peskiza aplikada.
“UNTL iha responsabilidade atu prepara profisionál kompetente no kualifikadu sira ne’ebé bele kontribui ba dezenvolvimentu sosiál, ekonómiku no teknolójiku Timor-Leste. Teknolojia geospatial importante tebes tanba nia aplikasaun iha jestaun rai, planeamentu, agrikultura, protesaun ambientál no jestaun dezastre.
Kooperasaun entre UNTL, liuliu FECT ho SuperMap Software Co. Ltd. bele liga koñesimentu akadémiku ho prátika, promove inovasaun no hasa’e kapasidade estudante no dosente sira atu responde ba nesesidade nasaun nian”, Dehan Reitór iha Videokonferénsia, Díli (12/10).
Reitór espera, liuhusi kooperasaun ida-ne’e sei lori benefísiu konkretu ba universidade, liuliu ba estudante, dosente no dezenvolvimentu Timor-Leste nian.
Entretantu Ms. Evelyn Sun hatete, SuperMap haree katak TL iha potensia boot atu utiliza Geographic Information System (GIS) no teknolojia geospatial.
“Ami agora iha prosesu atu estabelese eskritóriu lokál iha Timor-Leste. Ami sente kontente tebes atu koopera ho UNTL, tanba nu'udar universidade prinsipál ida iha nasaun ne’e.
Ami planeia atu oferese formasaun sira hodi hasa’e koñesimentu no kapasidade estudante no dosente sira iha utilizasaun teknolojia geospatial tanba ne’e SuperMap kompromete an atu apoia universidade hodi harii no dezenvolve kapasidade GIS.”, Dehan nia.
Partisipa husi Pro-Reitor para os Assuntos da Cooperação Professor Cristóvão dos Reis, Dekanu Faculdade de Engenharia Ciência e Tecnologia (FECT) Prof. Adalfredo G. da Silva Ximenes, Vice-decano Assuntos da Cooperação e Pesquisa (FECT) Prof. Leandro Madeira Branco, Mr. Raka Admiral Abdurrahman Technical Engineer, Mr. Teuku Muhammad Mifdhal Ridho Technical Manager SuperMap Indonesia.
