Universidade Nacional Timor Lorosa’e (UNTL), liuhusi Diresaun Nasionál Informátika no Teknolojia (DNIT), Departamento de Informação nia Xefe Josefa Vila Nova, hateten Sistema Informasaun Akadémika (SIA) implementa ona iha fakuldade 9 iha universidade, hodi fasilita prosesu administrasaun.
“SIA implementa ona iha fakuldade 9 iha UNTL, no ikus liu maka Faculdade de Ciências Sociais e Políticas (FCSP). Sistema ida-ne’e implementa hodi fasilita funsionáriu no dosente sira iha prosesu administrasaun.
Depois implementasaun, ami nia ekipa kontinua halo monitorizasaun hodi husu no identifika difikuldade sira iha kada fakuldade, atu nune’e bele kontinua hadi’a sistema no garante katak SIA nafatin funsiona ho di’ak”, dehan Xefe DNIT Josefa, iha Kampus Sentral, Díli (21/09).
Vice-Decano para os Assuntos Académicos, Faculdade de Ciências Sociais e Políticas (FCSP), Professor José da Costa Magno, hateten katak FCSP kontinua halo prosesu preparasaun no aprendizajen kona-ba SIA.
“SIA ami simu ona, maibé iha tinan ida-ne’e FCSP kontinua aprende liuhusi formasaun, hodi nune’e bele garante katak iha tinan 2027 SIA bele uza ho kualidade. Liuhusi sistema ne’e, ami bele redús servisu manual, fasilita jestaun nota no dadus estudante, no ajuda monitoriza progresu akadémiku. Nune’e, SIA aumenta efisiénsia no kualidade servisu akadémiku”, dehan VDAA-FCSP José.
Vice-Decana para os Assuntos Académicos, Faculdade de Ciências Exatas e Naturais (FCEN), Professora Alexandrina da Silva, hateten katak SIA fasilita tebes prosesu atendimentu no administrasaun akadémika iha FCEN.
“Desde implementasaun Sistema SIA iha FCEN, ami sente katak prosesu jestaun akadémika sai fasil liután kompara ho sistema manual. SIA ajuda ami asesu no jere informasaun ho lalais, sistemátiku no akuratu, enkuantu sistema manual presiza tempu ho nune'e maka ami kontenti uza sistema ne’e tanba simples, efisiente no organizadu”, dehan.
Mónica Ana da Costa, estudante husi FCEN, hateten katak SIA di’ak tebes kompara ho sistema atendimentu manual.
"Ha'u kontente ho mudansa iha atendimentu administrativu ne’ebé agora muda ona ba sistema digital, liuhusi SIA. Sistema ida-ne’e fasilita ami asesu informasaun kona-ba valor, disiplina no rezultadu akadémiku ho lalais no efisiénsia.
Ha'u rekomenda ba fakuldade 10 iha UNTL, liuliu dosente sira, atu uza no aproveita SIA ho efetivu, tanba ita tama ona iha era dijital. Ida-ne’e bele ajuda hadia jestaun akadémiku, aumenta efisiénsia no fasilita asesu ba informasaun estudante sira”, dehan.
