Universidade Nacional Timor Lorosa’e (UNTL) nia Magnífiku Reitór Prof. Joviano António da Costa, M. Eng partisipa Model ASEAN Meeting 2026 ho tema “One Vision, One Identity, One Community: ASEAN Leaders Working Together for a Sustainable Future” iha Palm Spring Hotel Fatuhada, Díli (10/06).

“Esperiénsia prátika ida-ne’e importante, tanba ASEAN halibur nasaun sira ne’ebé iha istória, kultura, nivel dezenvolvimentu no prioridade nasionál ne’ebé diferente. Tanba ne’e, kooperasaun rejionál presiza kapasidade atu rona, komprende perspetiva diferente sira, negosia no buka pontu komún”, dehan Reitór.

Reitór enkoraja partisipante sira atu aproveita oportunidade refere hodi troka ideia, rona ho perspetiva diferente sira, no esperiénsia oportunidade no dezafiu sira ne’ebé envolve iha prosesu atu atinji pozisaun komún.

Reprezentante Embaixada Estadus Unidus iha Díli, Ms. Charllete Bets hatete, eventu importante ida-ne’e, hanesan konkluzaun ba programa Professional English for Strategic Leaders, ne’ebé realiza simulasaun kona-ba eventu internasionál ne’ebé Timor-Leste sei organiza iha Dili 2029.

“Durante programa ne’e, imi hatudu esforsu no dedikasaun, no rezultadu ne’ebé hetan hatudu katak imi halo ona progresu importante. Imi aprende atu hato’o pozisaun ho klaridade no buka pontu komún. Kapasidade sira-ne’e sei fó benefísiu ba imi-nia futuru.

Estados Unidos orgullu atu apoia TL nia papel ne’ebé dezenvolve iha ASEAN. Enkuantu nasaun ne’e assume nia pozisaun iha rejiaun Sudeste Aziátiku, presiza profisionál sira ne’ebé bele reprezenta nasaun ho konfiansa no profisionalizmu”, dehan nia.

Eventu ne'e organiza husi Centro Uma Amérika UNTL. Partisipa husi Vise-Ministra ba Asuntu ASEAN, S.E. Milena Maria da Costa Rangel, Koordenadór Uma Amerika Sr. Ezaquel de Jesús Ribeiro, Membru sira husi Kórpu Diplomátiku, Reprezentante Governu, Instituisaun Parseria no estudante sira.