Universidade Nacional Timor Lorosa'e (UNTL) nia Magnífiku Reitór Profesór Dr. Joviano António da Costa, M.Eng., hato'o agradesimentu ba estrutura Associação Académica Estudantil (AAE) tuan 2024-2026 no husu lideransa foun (2026-2028) atu hametin unidade, kooperasaun no komitmentu hodi kontinua dezenvolve universidade.
“Ha’u agradese ba Senadu Estudante no estrutura sira iha períodu 2024-2026, tanba sira-nia dedikasaun no kontribuisaun. Ba estrutura foun, mai ita hametin unidade no kooperasaun, tanba UNTL mak patrimóniu komún ita hotu nian. Tanba ne'e, mai ita servisu hamutuk ho komitmentu atu hasa'e naran di'ak no dezenvolve universidade ida-ne'e ba futuru ne'ebé di'ak liután,” dehan Magnífiku Reitór iha serimónia tomada de posse ba estrutura foun husi fakuldade 10, iha Kampus FECT Hera, Díli (31/07).
Senadu Jerál Estudantil, César João M. Baptista, hateten katak knaar ida-ne'e la'ós de'it pozisaun, maibé kompromisu atu reprezenta aspirasaun, interese no nesesidade estudante sira ho integridade, transparénsia no komitmentu.
“Senadu no estrutura foun sira simu responsabilidade atu reprezenta interese estudante sira ho integridade no responsabilidade. Tanba ne'e, presiza hametin kooperasaun, unidade no diálogu ho estrutura hotu iha UNTL, hodi garante atividade akadémika no servisu ba estudante sira lao ho di'ak no fó benefísiu ba komunidade akademika tomak,” dehan Senadu Jerál UNTL.
Cidália Ana da Silva, nu'udar Prezidente Reunião Geral de Alunos (RGA) períodu 2026-2028 husi FMCS, hateten katak estrutura foun komprende responsabilidade ne'ebé simu liuhusi konfiansa estudante sira no sei hala'o ho seriedade, integridade no komitmentu.
“Ami komprende katak responsabilidade ne'ebé ami simu nu'udar estrutura foun mak kompromisu atu servisu ho integridade, responsabilidade no espíritu kooperasaun. Ami sei hala'o papel reprezenta estudante sira ho seriedade, hametin diálogu ho estrutura fakuldade no universitária hotu, kontribui ba dezenvolvimentu atividade akadémika no progresu UNTL”, dehan RGA Cidália.
Serimónia tomada de posse ne'e ba estrutura AAEF foun husi Faculdade de Agricultura (FAGRI), Faculdade de Ciências Exatas e Naturais (FCE), Faculdade de Ciências Sociais e Políticas (FCSP), Faculdade de Direito (FD), Faculdade de Economia e Gestão (FEG), Faculdade de Educação e Humanidades (FEH), Faculdade de Engenharia, Ciências e Tecnologia (FECT), Faculdade de Filosofia, Ciências Humanas (FFCH), Faculdade de Medicina e Ciências da Saúde (FMCS) no Faculdade de Turismo, Artes, Indústrias Criativas e Culturais (FTAICC).
