Universidade Nacional Timor Lorosa’e (UNTL) nia Magnífiku Reitór Profesór Dr. Joviano António da Costa, M.Eng hala’o enkontru ho Ekipa ba Avaliasaun Dokumentu ba Dosente (EADD) nia Prezidente Acacio Cardoso Amaral, iha Videokonferénsia, UNTL nian, Díli (12/08).
Reitór hatete, diskusaun ne’e atu rona aprezentasaun rezultadu avaliasaun ba dosente sira nune’e sertifika tuir saida mak EADD halo ona, liuliu kualidade investigasaun no ensinu nian.
“Ohin ita iha ne’e hodi deskuti rezultadu avaliasaun ba sertifikasaun ba kareira dosente nian, liuliu fó pontu sira tuir kualidade instituisional nian, no ita bele hadia hamutuk ba futuru. Ha’u prontu atu rona saida mak ita deskuti. Tanba kualidade grau B3, B2 no B1 ne’e tenke justu hodi kontribui ba kualidade instituisional nian”, dehan Reitór.
Prezidente EADD Profesór Acacio Cardoso Amaral hatete, avaliasaun ne’e presiza hadia pontu kona-ba grau sira bazeia ba nível estudu no hadia mós notas sira ba publikasaun revista sira iha N
nasional no internasional, tanba husi publikasaun sira ne’e mak hatudu UNTL nia prestasaun iha mundu internasional.
“Husi ami-nia avaliasaun ami nota katak, ita presiza hadia mak grau tuir nivel lisensiatura, mestradu no doutoramentu nian. Ita mós presiza haree didi’ak produsaun livru no publikasaun sira tuir nia kualidade atu la implika ba prestasaun di’ak universidade nian, tanba ita la presiza kuantidade, maibé ita presiza ninia kualidade”, dehan Prezidente EADD.
Diretor-Geral do Gabinete de Certificação do Docente Universitário (DG-GabCEDU) nian, Dr. Rui da Cruz hatete, bazeia ba despaixu N.º 20/UNTL/R/IV/2026, 24 abril 2026, husi Magnífiku Reitór hodi fó dalan ba ekipa halo avaliasaun ba dokumentu ne’ebé aprezenta ona husi dosente sira tuir área estudu, ba efeitu ba progresaun iha kareira nian.
“Ohin ami mai atu aprezenta ba Reitór kona-ba rezultadu avaliasaun ba kareira dosente sira nian, liuliu foku ba ensinu, investigasaun no servisu komunitáriu, hodi hasa’e pontu sira tuir nível kualifikasaun instituisional”, dehan Diretór Jerál.
Akompaña husi Proreitór ba Asuntu Kooperasaun nian, Profesór Cristovão dos Reis, no ekipa avaliadór EADD nian.
