Universidade Nacional Timor Lorosa'e (UNTL) nia Magnífiku Reitór Profesór Dr. Joviano António da Costa, M.Eng, abertura simpoziu akadémiku ho tema " Hakbi’it Feto Rural liuhusi Koñesimentu, Arte Kultura no Kreatividade: Avansa Timor-Leste ida ne'ebé Inkluzivu no Sustentavel” hodi Komemora Loron Feto no Loron Nasionál Kultura, iha Gleno, Ermera (13/10).
“Ha’u espera katak simpóziu ida-ne’e bele hametin kooperasaun entre instituisaun sira, komunidade akadémika no komunidade lokál atu hadi’a feto rurál sira-nia moris no promove patrimóniu kulturál. Hafolin kontribuisaun feto rurál sira-nian no preserva kultura mak importante atu harii Timor-Leste ne’ebé justu no inkluzivu”, dehan Reitór.
Sekretéria Estadu ba Igualdade (SEI), S.E. Elvina Sousa Carvalho hato’o apresiasaun klean ba CEGDI-UNTL no nia ekipa, ne’ebé hatudu kompromisu makaas hodi avansa programa igualdade jéneru, liuhosi peskiza no semináriu sira iha sosiedade akadémika.
“Igualdade jéneru la’ós responsabilidade Sekretaria Estadu ba Igualdade (SEI) nian de’it, maibé responsabilidade komún ne’ebé presiza kompromisu no kolaborasaun hosi ita hotu.
Hato’o mós apresiasaun ba Magnífiku Reitór, tanba liuhusi ita-nia lideransa, CEGDI-UNTL hetan apoiu importante atu hala’o nia knaar. Husu atu apoiu nafatin ezisténsia no operasonalizasaun Gabinete ida-ne’e. SEI iha esforsu atu promove igualdade jéneru iha atividade no área sira ne’ebé UNTL hala’o”, dehan nia.
Representante PAM Ermera José Martinho dos Santos Soares hato’o apresiasaun ba UNTL liuhusi CEGDI ho parseria sira ne'ebé promove inisiativa simpoziu akadémiku refere.
“Simpoziu akadémiku ida-ne’e oportunidade atu liga peskiza akadémika ho esperiénsia moris feto rurál sira nian, fahe esperiénsia no rekomendasaun kona-ba asesu ba edukasaun, saúde, oportunidade ekonómika no protesaun hasoru violénsia. Atensaun mós fó ba feto ho defisiénsia sira ne’ebé enfrenta barreira atu partisipa. Bainhira ita rona feto no valoriza sira-nia kapasidade, ita hametin família, komunidade no futuru nasaun nian”, dehan PAM.
Eventu refere organiza husi Centro de Estudo de Género, Diversidade e Inclusão (CEGDI) hamutuk ho Centro de Estudo Arte e Cultura (CECA), Visereitoria Asuntu Akdémika, UNAER, Container Tais, PAM Ermera no suporta husi Telkomcel no Banco Nacional de Comércio de Timor-Leste (BNCTL).
Partisipa husi Autoridade Munisípiu Ermera, Sekretaria Estadu ba Igualdade (SEI), Sekretaria Estadu Arte no Kultura, peskizadór, konvidadu, komunidade no estudante sira.
