Universidade Nacional Timor Lorosa’e (UNTL), nia Pró-Reitor para os Assuntos de Cooperação (PRAC), Professor Dr. Cristovão dos Reis, realiza Zoom Meeting ho bolseiru ativu hamutuk na'in ruanulu resin sia (29) ne’ebé kontinua sira-nia estudu mestradu no doutoramentu iha Portugal no Brazil.

Enkontru ne’e hala’o iha Videokonferénsia UNTL, Díli (12/08), atu monitoriza no akompaña direta progresu akadémiku bolseiru sira ne’ebé kontinua estudu iha nivel mestradu no doutoramentu.

Aleinde ne’e identifika difikuldade no dezafiu sira durante prosesu formasaun, no buka solusaun hodi fasilita sira-nia estudu.

Bolseiru hirak ne'e na'in ruanulu (20) mak kontinua estudu iha Portugal, mestradu (7) no doutoramentu (13) no na'in sia (9) kontinua estudu iha Brazil, mestradu (3) no doutorametu (6).

Reuniaun ne'e partisipa husi bolseiru ativu sira, no ekipa Gabinete PRAC.