Universidade Nacional Timor Lorosa’e (UNTL) nia Pro-Reitór para os Assuntos de Desenvolvimento Infraestruturas (PRADI), Prof. Alfredo Ferreira, informa katak konstrusaun edifísiu foun Instituto Nacional de Linguística (INL) atinji ona 62,50%.

Profesór Alfredo Ferreira hatete katak konstrusaun edifísiu INL nian seidauk remata, tanba ne’e, parte universidade estende tan kontratu ho kompañia to’o fulan Dezembru 2026.

“Projetu ne’e ita estende kontratu ba dala hira ona, tanba kompañia hasoru difikuldade, liuliu kona-ba material no seluk tan. Situasaun ne’e halo konstrusaun atraza, nune’e parte UNTL estende tan kontratu to’o fulan Dezembru tinan ne’e, hodi finaliza projetu”, hatete Pro-Reitór Alfredo iha Kampus Sentral UNTL, Díli (17/09).

Diretora Kompañia Dwiponggo Bee Feto Kaduak Tata JV, Sra. Alexandrinha B. da Costa, hatete katak kompañia kontinua halo esforsu atu finaliza konstrusaun iha fulan Dezembru 2026.

“Ami kontinua halo esforsu atu rezolve difikuldade sira, liuliu kona-ba material. Material balun ami sosa iha rai-laran no balun ami importa husi rai-liur no ami espera katak material sira bele to’o sedu no kompletu atu bele aselera servisu. Aleinde ne’e mós ami sei aumenta mós númeru traballadór sira, hodi halo servisu mós iha tempu kalan, nune’e bele finaliza konstrusaun ho lalais”, hatete Diretora Alexandrinha.