Universidade Nacional Timor Lorosa’e (UNTL) nia Proreitór ba Asuntu Dezenvolvimentu Infraestrutura, Prof. Alfredo Ferreira, atualiza katak progresu konstrusaun edifísiu foun Laboratóriu Integradu no Faculdade de Ciências Exatas e Naturais (FCEN) iha Hera, atinji ona 52,23%.

“Projetu edifísiu Laboratóriu Integradu no Faculdade de Ciências Exatas nian iha Hera ne’e la’o hela. Kontratu mós ita estende ona ba dala tolu. Extende ikus ne’e sei to’o de’it iha fulan Dezembru 2026 no sira promete sei finaliza projetu ne’e tuir tempu ne’ebé determina ona. Agora nia progresu foin atinji 52,23%”, hatete Proreitór Alfredo iha Kampus Sentral UNTL, Díli (15/09).

Enjeñeiru husi Kompañia Cabitama Natalino da Costa hatete, prosesu konstrusaun atualmente tama ona iha faze plester.

“Durante konstrusaun difikuldade ne’ebé kompañia sempre hasoru mak traballador sira dala ruma husu lisensa no balun sai, nune’e ami tenke buka traballadór foun atu substitui sira, maibé dadaun ne'e servisu tama ona ba plester, hadia fatin ba lift nian, instalasaun eletrisidade no seluk tan,” hatete Enjeñeiru Natalino.

Projetu Laboratóriu Integradu no Edifísiu FCE ne’e lansa iha 12 Dezembru 2024, ho dimensaun 25 × 23 metru, kompostu husi andar tolu, no nia implementasaun konstrusaun responsabiliza husi Kompañia Cabitama, Lda.