Implementasaun SRM simplifika servisu administrativu

Implementasaun SRM simplifika servisu administrativu

𝐔𝐍𝐓𝐋-𝐈𝐌𝐏𝐋𝐄𝐌𝐄𝐍𝐓𝐀𝐒𝐀𝐔𝐍 𝐒𝐑𝐌 𝐒𝐈𝐌𝐏𝐋𝐈𝐅𝐈𝐊𝐀 𝐒𝐄𝐑𝐕𝐈𝐒𝐔 𝐀𝐃𝐌𝐈𝐍𝐈𝐒𝐓𝐑𝐀𝐓𝐈𝐕𝐔 - 1

Universidade Nacional Timor Lorosa’e (UNTL), liuhusi Vice-Decana Para os Assuntos Académicos, Faculdade de Turismo, Artes, Indústrias Criativas e Culturais (FTAICC), Profesora Cecília Gomes Amaral Cortereal, hateten Sistema Repositóriu Monografia (SRM) fasilita sistema arkivu dijitál iha universidade.

“Agora, iha tinan ida-ne’e, ita hahú dijitaliza prosesu arkivamentu monografia. Estudante sira bele submete diretamente ba sistema repositóriu. Tanba ne’e iha futuru bele sai hanesan fonte referénsia ba estudante, departamentu no komunidade akadémika sira, nune’e mós lapresiza espasu barak atu arkiva”, hatete Profesóra Cecília, iha Kampus Sentral, Díli (06/11).

Iha sorin seluk, Vice-Reitor para os Assuntos Académicos (VRAA), Profesór Câncio Monteiro, hatete katak, durante vizita ba fakuldade sira, ekipa Reitoria identifika limitasaun espasu fíziku, liuliu ba sala aula, eskritóriu servisu ba dosente no fatin arkivamentu dokumentu.

“Limitasaun hirak ne’e sai fundamentu ida, atu ita tenke fó prioridade ba dijitalizasaun, hahú ho arkivamentu monografia, atu fó asesu ba ema barak hodi uza hanesan referénsia ba estudu no peskiza. Nune’e, espasu fíziku ne’ebé antes utiliza atu rai dokumentu bele uza ba nesesidade seluk, no dokumentu sira mós bele rai ho seguru”, hatete Profesór Câncio.

VRAA Monteiro fundamenta katak, implementasaun SRM sai pasu importante dahuluk iha esforsu digitalizasaun dokumentu institusionál, hahú husi monografia, depois iha faze tuirmai bele kontinua ho dijitalizasaun dokumentu seluk.

“Númeru monografia ne’ebé fakuldade sira submete ba gabinete no rejista iha SRM hatudu katak finalista sira ne’ebé sei gradua iha tinan ida-ne’e konsege arkiva sira-nia monografia iha sistema. Ida-ne’e mós rezultadu husi kolaborasaun di’ak entre fakuldade sira”, aumenta Vise-Reitór.

Bazeia ba dadus ne’ebé fakuldade sira submete ba SRM hamutuk 1.758. Maibé, depoisde verifikasaun, finalista ne’ebé kontinua ba prosesu graduasaun hamutuk 1.738, enkuantu estudante na’in 20 mak la konsege rejista ba graduasaun faze daruak nian iha tinan 2026.