Universidade Nacional Timor Lorosa’e (UNTL) nia estudante husi Faculdade de Ciências Sociais e Políticas (FCSP) Herminia Soares Ximenes hateten, liuhusi semináriu ne’ebé partisipa bele aprende hodi valoriza luta eroi sira-nian hodi inspira foinsa’e sira iha futuru.

“Ita valoriza eroi sira-nia luta hodi inspira foinsa’e sira, atu aprende didi’ak hodi kontribui ba rai ida-ne’e nune’e ema hotu bele moris iha justisa no transparánsia nia laran. Husi istória luta joven uluk nian hetan libertasaun.

Ohin loron ita ho matenek no kapasidade atu bele dezenvolve fali rai ne’e ho di’ak’’, dehan Herminia iha ámbitu komemorasaun loron FALINTIL 20 Agosto (1975-2026) no konsulta popular 30 Agosto (1999-2026) iha Auditóriu FCSP, Caicoli-Díli (26/08).

Oradór Tenente Jeneral Domingos Raul “Falur Rate Laek” hatete, iha semana hirak ikus ne’e hala’o jornada ba fatin hirak ne’ebé povu terus ba, hodi fó omenajen ba martir sira no halo rekonsiliasaun entre ema moris.

“Ita aprende katak rekonsiliasaun tenki prátika lor-loron liuhusi respeitu mutua, ha’u fó hanoin mós ba imi hotu katak dame mak sai hanesan responsabilidade boot ida ne’ebé pertense sidadaun akadémiku sira.

Martir Timor oan hotu la hare ba partidu ka pensamentu ne’ebé sira atu defende, ema hotu-hotu rai ida ne’e nia oan, unidade hanesan iha ai laran, foho lolon ne’ebé ohin loron ita hotu iha responsabilidade atu preserva iha instituisaun sira, família no universidade sira”, dehan Oradór Tenente Jeneral.

Semináriu ne’e realiza tanba servisu hamutuk Centro Estudo de Género Diversidade e Inclusão (CEGDI) ho Centro Estudo Cultura e Arte (CECA) durante loron 26-27 Agosto, kompostu husi atividade espozisaun Pintura Veteranu, Muzika, Poezia, Artezanatu no Filme.