Universidade Nacional Timor Lorosa'e (UNTL) liuhusi Gabineti Provedor do Estudante (GPE), realiza misa agradesimentu ba graduadu na’in-rihun ida atus haat neennulu resin ida (1461) ne’ebé prepara ona ba graduasaun iha període dahuluk tinan akadémika 2026 nian ba dala XXXIV, iha Igreja Catedral, Díli (22/06).

Iha omilia, Pe. Clemente Moreira Fdcc hatete, hamutuk hahí ba Maromak Nia di’ak tomak ne’ebé soi ona ba ema hotu. Hanesan ema ne’ebé intelijente la’ós akadémiku de’it, maibé hanesan mós ema fiar na’in hodi relembra graduadu, família no dosente sira-nia dedikasaun, esforsu, tempu, pasiénsia to’o ohin loron sira remata ona.

“Hanesan ema fiar na’in hamutuk ho família no sivitas tomak selebra Santa Misa ida-ne’e hodi hasa’e agradesimentu ba Maromak ba grasa, intelijénsia, sabedoria no matenek nu’udar momentu ne’ebé espesial iha apostulu sira-nia moris nune’e mós ita lao hamutuk ba oin ho konfiansa to’o susesu iha futuru tuir kualifikasaun ne’ebé forma tiha ona husi UNTL”, dehan Padre Clemente.

Magnífiku Reitór Profesór Dr. Joviano António da Costa, M.Eng. agradese ba Padre, Madre inklui komisaun organizadora ba realiza ona misa ne’e no preparasaun sira ba serimónia solene graduasaun nian.

“Ohin ita agradese ba Maromak, tanba la fasil ba ita atu to’o momentu ida-ne’e, ha’u fiar katak to’o iha faze ida-ne’e ho sakrifísiu boot hodi atinji objetivu ida mak sai lisensiadu no mestradu. Atinjimentu ida ne’e mak ita-nia orgullu, tanba ne’e UNTL hakarak hato’o parabéns no susesu ba imi hotu. Agradese mos ba ema hotu ne’ebé hola parte iha preparasaun ba misa ida ne’e ho susesu”, dehan Reitór.

Misa agradesimentu ne'e, akompaña husi Amu Kapelaun nu’udar mós Koordenadór ba GPE nian, Padre Nivio Correia Lebre Fdcc no Padre Fermin Leoveras Fdcc.

Partisipa husi Prezidente Komisaun Organizadora ba graduasaun nian, atual Visereitór ba Asuntu Akadémiku, Profesór Câncio Monteiro, Visereitór, Proreitór, Diretór Jerál, Diretór Nasional, Xefe Departamentu, Dekanu, Dosente, Funsionáriu, Inan-Aman no Graduadu sira.