Universidade Nacional Timor Lorosa’e (UNTL) liuhusi Faculdade de Turismo Artes Indústrias Creativas e Culturais (FTAICC) nia Departamento de Comércio e Turismo (DCT) realiza misa agradesimentu ba komemorasaun loron Mundiál Turizmu (27 Setembro 2026), iha Paroquia Santo Antonio Motael, Díli (24/09).

Dekanu FTAICC Profesór Feliciano Quintas do Céu hato’o agradese ba Pe. Selebrante ne’ebé ohin prezide ona misa ba iha komemorasaun loron mundial turizmu nian no agradese ba komisaun organizadór ne’ebé organiza atividade sira.

“Eventu ida-ne’e sai hanesan kultura ne’ebé fakuldade sempre hala’o, hodi promove estudante sira-nia talentu no ita hala’o atividade sira hahú ho husu Maromak nia tulun, atu bele la’o ho di’ak no Nia bele tulun ita atu forma estudante sira liuhusi atividade semináriu no festival kulturál.

Atividade sira-ne’e hodi prepara sira ba ajente prinsipál ba dezenvolvimentu iha nasaun iha área turizmu nian’’, Dehan Dekanu.

Provedor dos Estudantes Pe. Nívio Lebre Correia, FDCC hatete, agradese ba Maromak, tanba grasa tomak ne’ebé Nia haraik ona atu atividade hotu la’o ho di’ak.

“Iha opurtunidade ida-ne’e ita husu Maromak Nia grasa atu forma ita sai versaun ida ne’ebé la’ós aprende deit siénsia hodi sai matenek ba ita-nia aan, maibé ita mós buka hadia vida espiritual nian ba moris hotu ne’ebé ita hala’o, no hetan bensaun ba estudante sira bele sai ajente transformadór ba nasaun ida-ne’e”, Dehan Pe. Nivio.

Partisipa husi Dekanu FTAICC ho estrutura, Kon-Selebrante Pe. Clementino Moreira Fdcc, Funsionáriu Dosente, Alumni, Estudante inklui konvidadu sira.