Universidade Nacional Timor Lorosa’e (UNTL) Faculdade de Turismo Artes Indústrias Creativas e Culturais (FTAICC) nia Departamento Comércio e Turizmo (DCT) realiza semináriu ho tema “Inovasaun no Importánsia Dijitalizasaun hodi Kapasita Juventude sira iha Setór Turizmu” iha Auditórium FEG, Díli (24/09).
Dekanu FTAICC Profesór Feliaciano Quintas do Céu hato’o agradesimentu ba oradór sira, tanba fó tempu partilla esperiénsia ba estudante sira.
“Seminariu ida-ne’e realiza iha ámbitu komemorasaun Loron Mundiál Turizmu (27 Setembru 2026) hodi fó opurtunidade ba estudante sira atu fortalese koñesimentu, dezenvolve estudante sira-nia kreatividade no oinsa sira bele responsabiliza eventu ida, tema sira ohin semináriu ne’e koalia kona-ba dijitalizasaun no artifisial intelijensia bele fasilita no dezenvolve estudante sai progresivu, dezenvolvidu”, Dehan Dekanu.
Iha fatin hanesan Oradór Sr. Agostianos Brandão de Araújo hatete, esperiénsia ne’ebé partilla kona-ba Dijitalizasaun atu Kapasita Juventude no Promove Turizmu Sustentável ne’ebé utiliza mós Artifisial Intelijénsia (AI).
“AI nia vantajen boot tebes mai ita atu utiliza hodi bele ajuda iha servisu administrasaun públika sira liuliu iha dokumentu sira nomós dezafiu boot mai ita mak halo ita depedensia deit ba AI. Tanba ne’e situasaun reál turizmu nian ita presiza tun direta atu esperiénsia hodi haree no halo identifikasaun ba informasaun reál ne’ebé la hetan husi AI”, Dehan Oradór.
Partisipante Norfiana da Costa Husi DCT hatete, konsege aprende kona-ba oinsa garante ekonomia liuhusi turizmu no oinsa utiliza dijitalizasaun.
“Semináriu ida-ne’e fasilita ona estudante sira atu hatene utiliza di’ak ba dijitalizasaun liuhusi AI atu bele halo atrasaun ba turista sira mai vizita ita nia rai no atu bele hasa’e ekonomia sustentável liuhusi turizmu”, Dehan Norfiana.
Eventu refere realiza mós ho Kompetisaun Korál, Kulinária no kalan konsertu hodi komemora Loron Mundiál Turizmu 27 Setembru. Enkuantu iha implementasaun servisu hamutuk estudante, departamentu no fakuldade.
